Асият Буттаева, философиялул элмурдал доктор, профессор:
Ларгсса нюжмардий, шанма гьанттагу бувну, бувкIру жу Татарсттанная. Татарсттаннал Болгар тIисса шагьрулия арх бакъасса авлахърай буссар Исламрал акамедия.
Та академиялуву буллалисса хъуннасса агьамшиву дусса «ккуркки столданул» давривух гьуртту хьура нагу. Тиккун оьвкуну бия дунияллийсса цинявппа диндалул вакилтурайн. Цинявннал цачIуну сакин бан багьлай бия диннал дянив дахIавуртту дуллалисса ва диндалул кIулшивуртту хьхьичIуннай даву мурадрайсса ххуллу-чаранну ляхълахъисса агьамсса доклад.
Проектрал хъунмурну бия политикалул элмурдал доктор, Исламрал стратегиялул диалограл ва партнершиврул фондрал директорнал бигарду биттур буллалисса Эльмира Садикова.
Цинявннал цачIуну сакин дарду ялув кIицI ларгсса проектран хас дурсса аналитикалул докладрал схема. Дагъусттанная ва проектравун багьсса шама инсаннавух хIала бура нагу.
Проектрал даврил лагрулий бувсса протоколданий цIа куну ккаккан бувну буссар цуманал ци даву дантIиссарив. Гьуртту хьусса инсантурал бунни хъин-хъинсса, асар хьунсса ихтилатру. Миннавух ттул ихтилатгу буссия.
Ахирданий хIукму хьунни кIира лажиндарайсса мукьра раздел дусса диндалул масъаларттан хас бувсса аналитикалул доклад бан. Ккаккан унни гьарца бутIунсса каялувчигу. Ттуйнгу тапшур бунни Аьрасатнал региондалийсса исламрал кIулшивуртту дулаврил опытраясса шамилчинмур бутIа сакин бан. Ният дуссар ва доклад май зурул ахирданийнин къуртал бансса.
ХIакьинусса кьинигу бура, ттула докторшиврул диссертациялийнгу чул бивщуну, ва проектран хасъсса масъаларттаха зий.
ХIадур бувссар
Имара Саидовал
