Уттигъанну цила оьрмулул юбилей хьунадаркьунни цIа дурксса модельер, дизайнер, Дагъусттаннай хьхьичIва-хьхьичI Модалул театр тIивтIусса, цалчинма-цалчин модалул аукцион бувсса хъамитайпа, «Гала» цIанилусса

чIири предприятиялул сиптачи, ДР-лул Художниктурал-модельертурал ва дизайнертурал ассоциациялул председатель, «Русский силуэт» конкурсрал жулла региондалийсса вакил Оьмаханова Гулайла (Гала) МахIаммадлул душнил.

---

Бадрижамал Аьлиева
[dropcap]В[/dropcap]ай интнил цалчинсса гьант­райсса ванищалсса ихтилатгу хьунни, инт кунма куклусса, чаннасса.
Бувну бур Гала Къазаннал шагьрулий 1950-ку шинал Карашрал шяравасса МахIаммадлул ва Гьидаятлул кулпатраву. МахIаммад, жула зунттал чIявусса цайми арамтал куна, маэшатрал хъирив 1933-ку шинал лавгун ивкIун ур Къазаннайн, къалайчину зун. Хъун дяъви байбивхьувкун, МахIаммад Къазаннаява хушрай аьрайн лавгун ур ва дяъви байлитIуннин аьраяллил майданнай талайгу ивкIун ур.

Талай ивкIун ур хъунмурчIин казактурая ва ккавкказлувтурая сакин бувсса бурттигьалтрал Доваторнал дивизиялуву. Дяъвилия махъ ташугу бувну, кулпатращал архIал махъунай Къазаннайн ивзун ур. Вайннал ххювагу оьрчIгу (шанма душ ва кIия арс) бувну бур татарнал хъуншагьрулий.

Галал Къазаннай бувккуну бур техникум, дарзинал пишалулмур. Школалийссаксса хIаллай, 1-мур классрава байбивхьуну, 10-мур классравун бияннин, ацIрагу шинал лахъишиврий Гала фигурнай катаниялухун багьну бивкIун бур, микку цила оьрмулун лар­хьхьусса бунияласса ккаккиярттайнгу лавхъун бур.

Амма спортрал карьералул ахир хьуну дур фигурнай катаниялуву Галан чут язи угьан­сса чIун дуркIукун: цалва оьрчIру кьянкьану, зунттал зумуну тарбия буллалисса, чут-пара тIисса махъ бавнувагу къаччисса, буттал бувцуну бур душ спортрава махъунмай.

[dropcap]Я[/dropcap]ла, МахIачкъалалив бивзун махъ, Галал заочнайну бувккуну бур Къазаннал технологиялул институт.
Ниттил Гьидаятлул усттар­сса кару диркIун дур, ванил цила оьрчIан ва душваран янна ттисай­сса, дуруххайсса диркIун дур, кулпат бакI буккан баншиврул, хаснува дяъвилул щала ххуллу бивтсса лас МахIаммад ччяни дунияллия лавгун, ххюва ятин цила каруннихун багьсса чIумал. Му ппурттуву оьрчIаву хъунма-хъунмур Гулжамаллул цилла хъачIунттайн ларсун дур хъуннасса хъар, мюрщими уссур-ссурвавралсса бавриву бикIу, ичIаллил давурттаву бикIу.

[dropcap]Н[/dropcap]иттил бюхъу-бажар Галайнгу бивну бур. ЧIунархIал душваращал хIаятравух лечлай, тIуркIутIутIисса Галан ва мунищалсса душнин ца ххуллух тIайласса пурмалул юбкарду ччан бивкIун бур. Хъунма хIаллай пикри къабуллай, чIиви душнил ларсун хъунама уссил хIажак – хьхьичIарасса гьарта шароварду, кьувкьуну гьарччалтту, аьркиннийн ххалаххигу бувкIун, кIива юбка бувну бур – цинма ва цила дусъсса душнин.

[dropcap]М[/dropcap]укун­сса даву дувансса аькьлу-кIулши, бюхъу бивкIун бур оьрмулул 6-7 шинавува Галал.
Галал лас Оьмаханов Зубаир МахIаммадлул арснал къуртал бувну бур физикалул ва математикалул факультет, зий ивкIун ур М. ХIажиевлул цIанийсса завод­рай сменалул начальникну. Му аьпа­лул хьуну цаппарасса шинну ларгун дур. Вайннал дянив хьуну бур кIива душ – Сабрина ва Сибилла. КIинниллагу ларсун дур художествалул кIулшиву.

— ЦIанасса ттул пахруну бур душнил душ Тейлли, ва ттул хиялгур, умудгур, дакI дарцIуну бура ванил ттущава щаллу буван къавхьумур буванссар тIий, — тIий бур Гала.
Ниттил ва ниттил ниттил ххуллу язи бувгьуну, сивсусса шаттирдай най бур Тейлли: ЯтIул дип­ломрай Художествалул училище къуртал бувну бур, гьуртту хьуну бур модалул билаятрал лагрулий­сса личIи-личIисса конкурсирттай, цIанасса чIумал дуклай бур Косыгиннул цIанийсса Москавуллал инс­титутрал 2-мур курсирай.

Гала дакIнийхтунусса барчаллагьрай ва бусраврай зумух ласлай бур цила шяравасса Жяъпарова Аьйшат МахIаммадлул душнил цIа, цуппа, чIавасса душ, бувкIун Дагъусттаннайн, цучIав, цичIав къакIулсса чIумал, цила чIарав бавцIуссия тIий.
«Ванил кумаграйну 19 шинаву цалчинсса душ бувсса инсан, на, кьамул бувнав даврийн. Ттул дипломрай «закройщик» тIий чивчуну бунугу, на янна дурухлахисса бригадалуву щябивтунав. КIира шинавун бригадирну бивтунав. Ялагу декретрайн лавгссияв. ЦIунил даврийн буккайхту, хъунама инженернал оьвкуну, цIувххуна, янна ттисул даву биттур дуллан бюхъанссарив куну. Нагу дакI дарцIуну бюхъанссар увкуссия, — дакIнийн бутлай бур Гала.

[dropcap]М[/dropcap]у даврий кутIасса чIумул му­тталий Галал сий хъинну ларай хьуну дур, ванил цIа муштаритурал дянив машгьур хъанан диркIун дур. ВаничIа янна дурухханшиврул инсантал ччяни бучIайсса бивкIун бур, ирглий бацIан, цанчирча Галал гьантлун 10 инсан акъа кьамул къаувай­сса ивкIун тIий. ВаничIан буххан бигьа-бигьану къашайсса бивкIун бур. Республикалул хъуншагьрулий цIа машгьур хьуну, инсантал ваничIан нех дирхьуну бавчуну бур.
Гала цимилгу лавгун бур Москавлив пишакаршиврул даража лавай бувайсса курсирдайн, цIу-цIусса системартту лахьхьин стажировкарттайн.

— Инсаннан цалла дуллалимуниву хьхьичIуннайшивурттайн ла­хъан ччай ухьурча, мунан муданагу, ци оьрмулуву ухьурчагу, дуклан, цIу-цIусса затру кIул буллан аьркинссар, — тIий бур ва.
Усттаршиврул ххишала дакъа хъуннасса луртан дусса Гала махъа нанисса жагьилтурангу лахьхьин дуллай бур янна ттисин ва дуру­ххан.
1992-ку шиная шинмай Гала цинна ххирасса даву щаллу ду­л­лай бур Буйнакскийл цIанийсса кIичIиравусса хъуни дакъасса къатраву, «Модалул ва дизайнрал Гала Умахановал центр» ООО-лий. ВаничIан янна дуруххан занай бур жула къулугъчитал, эстрадалул чанна цIуртти ва укунмасса инсантал. Совет чIумаллив ваничIан занай бивкIссар партиялул хъуни къуллугъчитал, миннал ичIувами.

Гала бур цила цуппа був­сса, так цила захIматрайну, ма­хъун­май къашаврийну хьхьи­чIуннайшивурттайн бивсса хъамитайпа.
Хъаннил байрандалуцIунгу бавхIуну, жулва хъаннихь ци учин бюхъанссар увкукун, Гала тIий бур:
— Нигьа мабусаванни зулла образ, зулла имидж чIун-чIумуй да­ххана даван, зула-зула ласурвавран ссикъабуцIин, миннал иттала къабагьан. Инсан чув унугу, цIусса даврийн уххан най ягу цимирагу шинай ца кIанай зий – мунал лархсса янналул агьамшиву дуссар. Амма хIакьинусса кьини ттун хъинну къакъулай бизлай бур, жагьилсса душру бикIу, оьр­мулул шиннаву­сса хъами бикIу, аьркин дакъасса процедурардахун багьну бушиву, мурччив хъуни дуллай, насосрах лахъан дурсса ссихьрал кунна, лажинтру дючIан дуллай. Душру, хъами – циняв бур ца журалийн бувкIун. Чуври зул ляличIишиву, щихакIуй къалащаву!?

Инсаннал дакIниватур нур, чани бачин аьркинсса, му чIумалли мунал симангу авурну, ябацIанну чIалан дикIайсса, ци жигдатIру дунугу, тIабиаьтрая инсаннан ци лажин дирну дунугу. Хъамитайпа мудангу, цихва цуппа бурувгун, чур­ххахагу, лажиндарахагу аякьалий бикIан аьркинссар, амма муния культ дурну, ххалаххахун багьну бур чIявуми. Инсан бусса оьрмулий талихIрах луглай, муних ялугьлай икIай, талихIрив жувувар, жула дакIнивур бусса…

Барча вил оьрмулул юбилейгу, ялун нанисса Хъаннил байрангу, МахIаммадлул душ Гулайла! Вила оьрмулул мяъна-мурадну хьусса пишалий уттигу чIярусса шиннардий зунсса цIуллушивугу, гьавасгу, каши-кьудратгу чан къахьуннав вин.