[dropcap]Ф[/dropcap]евраль зурул 21-нний щалагу дунияллий кIицI лагай ниттил мазрал кьини. Аьдат­равун дагьсса куццуй, Ни­ттил мазрал кьинилун хас дурсса ххаллилсса байран хьунни гьашинугу цIуминалийсса ЦIуссаккуллал школалий.

Андриана Аьбдуллаева
Шикку гьуртту хьунни райондалул кIулшивуртту дулаврил управлениялул методист Мисиду Шагьмандарова, ДучIиннал школалул директор Бахттун Шуаьева, шаэр Бахттун Гъазиева, учительтал, нину-ппу. Байрандалул хьхьичI щала нюжмардий школалий най дия ниттил мазрайсса назмурду дуккаврил конкурсру, «Буттал шяравалу» тIисса чIирай кказит сакин баврил конкурсру, хьунни ниттил мазрал тIиртIу дарсругу. Вай гьармунил жям дуллалисса мажлис хьунни ва кьини лавайсса даражалий.

[dropcap]Ш[/dropcap]колалул зал чIюлу бувну бия байрандалун лавхьхьуну. ЧIирттайн лархъун дия лакрал шаэртурая бусласисса, миннал ниттил мазрая увкумур чивчусса стендру.ТIивтIуну бия жула сянатру – чирчри щащаву, тIаннуй накьич дишаву, ппал дюххаву, зуккуй ппалул ххаллу даву, тIахIни даву, накI рищаву, усру даву ва цаймигу пишарду кка­ккан буллалисса мурцIу. Ккаккиялун дирхьуну дия нукIура жула буттал буттахъал ишла дуллай бивкIсса матахI, тIивтIуну бия лакку дукрардал чIюлу був­сса ссупра. ОьрчIругу, учительталгу бия миллатрал яннардаву. Райондалул культуралул управлениялул зузалтрая, учительтурая ва дуклаки оьрчIая сакин бувсса фольклорданул группалул щаллу дунни Лакрал гимн.

[dropcap]М[/dropcap]ажлис бачин бувну бия школалул учительтал Фарида Базанова ва Аминат АхIмадханова. Дайдихьулий ихтилат бувна школалул директор Татьяна Айгуновал.
— Ниттил мазрал кьини кIицI дуллан бивкIссар 1952-ку шинал февраль зурул 21-нний Бангладешнал хъуншагьру Даккалий, цала маз буруччаврил цIаний майданнив бувккун, полициялул зузалтрал кьатI бувсса студентътурал ва дуклаки оьрчIал аьпалун. Гьашину кьуйлчин­сса шин дур дунияллул халкьуннал ва кьини кIицI лаглай. Гьарицагу цала миллат ххирасса, му яхьуну ччисса инсаннал хIарачат бикIан аьркинссар цала мазгу, миллатрал культура ва аьдат-эбадатругу ядан, — увкунни ванил.

Хъирив дуклаки оьрчIал дурккунни лакку мазрайсса назмурду, увкунни балайрду. Хъинну усттарну бивхьунни ттизаманнуцIун бакьин був­сса Х. Авшалумовлул «Мугьисалт» тIисса произведениялувасса парча. Ккаккан дунни хъарас щаврил аьдат, дунни дуаьртту. «Щаращи» тIисса школалул ансамбльданул ккаккан дунни лак­рал къавтIавуртту.
Байран чIюлу дунни Арслан Шагьмандаровлул, Кьур­банмахIаммад Айгуновлул балайрдал.