ХIурмат бусса аьрасатлувтал! Аьзизсса дустал!
На зуйн лаизлай ура жува циняв гьалак буллалисса ма­съалалул хIакъираву.

Жунма чIалай бур, цуксса анаварну даххана хъанай дуссарив дунияллий коронавирусрацIунсса тагьар. ЧIявусса билаятирттай гьарза хъанай бур къашавай хьуми. НигьачIаву диян най дур щалла дунияллул экономикалийн, цIанара чIалай дур му лияншиву.

Ттинин бувсса хIарачатирттайну жущава бюхълай бур цалсса азар ччясса мутталий ппив хьун къадитан. Амма жунма чIалай бур­хха Аьрасатнаща къахьун най бушиву ялун дирсса нигьачIаврил хьхьичIалу кьукьин. Жула дазур­дачIа дунутIий эпидемиялул лиян дурсса паччахIлугъру, мунияту му азарданул хьхьичIалу кьукьин, жучIанна дучIан къадитан къашайссар.

Амма жущава бюхъаймур жува буллай буру. Ттизаманнул медициналул система зузи дурну дур, профилактикалул давуртту дачин дуллай бур. Циняв азарханардал духтуртурахь, анаварсса кумаграл пишакартурахь ва аьлимтурахь дакIнийхтуну барчаллагь тIий ура зула жандалий хIайп къакуну дуллалисса давурттахлу.
Циняв инсантурахь тавакъю буллай ура хIакинтурал ва власт­рал органнал маслихIатру лаласун. ЦIана миннуйн чIявусса затир­ттал хъар дутлатиссар. ЛяличIину му багьлагьиссар оьрмулул бугьара хьуминнайн, лахъи ларгсса азарду думиннайн.

[dropcap]Н[/dropcap]а тавакъю буллай ура апрельданул 22-нний Конституциялуву дурсса дахханашивурттахлу чIурду булун бучIан. Амма жула агьалинал оьрму ва нигьачIаврия буруччаву жунна гьармурнияр хьхьичIссар. Мунийн бувну, ттул пикрилий, чIурду булаврил кьини махъун ласун аьркинни.
ЦIана тIурча, агьамсса ишну хъанахъиссар азар анаварну ппив хьун къадитаву. Мунийн бувну баян буллай ура хъиривмур нюжмар къазузимурну хъанай душиву, харжругу ябувну. Бигьалагай кьинирду лахъи лаглагиссар мартрал 28-нния апрельданул 5-ннийнин. Гьалбаттаки, оьрмулун аьркин­сса циняв идарартту, миннувух медициналул идарартту, аьпттикIру, ттучанну, банкирдал, финансирттал хIисав-санну (расчетру) дай­сса идарар­тту, транспорт ва мукунна цинярда властрал органну зузиссар.
Аьркинссар жувагу, жулва гъан-маччамигу буруччин, низам ва жаваблувшиву хIасул дуван. ЦIанасса ппурттуву яла мюхчанмур – шаппа личIавур.

[dropcap]Я[/dropcap]ла Аьрасатнал Президентнал бувсунни социал-экономикалул тагьарданул хIакъираву, инсантал социалну буруччиншиврул дуван аьркинсса, доходру ва зузи кIанттурду сахла буваншивруцIунсса, чIиримур ва дянивмур бизнесрацIун кабакьинсса давурттаяту.
Инсантурал циняв социал пособияртту ва хIаллихшинну яла гъансса 6 зурул мутталий лахъи лаган бантIиссар, цукунчIавсса справкартту — за къадуллунна.

Бюхттулсса Ххувшаврин 75 шин шаврицIун ветерантуран ва къинттуллух зий бивкIминнан дулунсса 75 азарда ва 50 азарда къурушру дулун аьркинссар майрал байранну хьуннинна, апрельданийра.
Аьркинссар кумаг буван оьрчIру бусса кулпатирттан. Апрельдания тIайла хьуну, ниттихъал капитал ласаван ихтияр дусса кулпатир­ттан дулун ялун ххи дурссар 5 азарда къуруш шанма зурул мутталий. Мукуннасса кредитирттал мухIлухIин ккаккан дуван аьркинссар ишбажаранчитурангу.

Аьркинссар кумаг буллан чIиримур ва дянивмур бизнесран, мюрщисса идарарттан давуртту дяличIан къадитаншиврул, цалва зузалт сахла баншиврул. Давур­ттал щаллу буллалиминнайн лаизлай ура – захIматрал рынокрай ссуссукьушиву, нукьсаншиву хьун къадитан, зузи кIанттурду ябан. ПаччахIлугърал бизнесрацIун кабакьу бантIиссар му масъала дузал буван.

ЦIана дуван ккаккан дурсса ва уттигу ккаккан дувантIисса цинярда давуртту щаллу дантIиссар ва миннул хIасиллугу хьунтIиссар, агарда жува цачIун хьурча ва цIанасса захIматсса тагьар лаласун бюхъарча. Агарда паччахIлугъ, общество, инсантал цачIу, бавкьуну къуццу тIурча, жущава шаймур булларча.