Авазалулли азурда бувайсса

Авазалулли азурда бувайсса

Ххуйну дакIний бур, ЦIусса­лаккуйн Чачаннал аьрщарая боевиктал ххявхсса ппурттуву, тани ополчентурал кьюкьлул хъунаману ивкIсса Артур Исрапиловлул ,

дайдихьулий яла захIматмур иш цумур бия учайхту, агьалинал оьккисса аваза бия, паника ялу- ялун ягин хъанай душиврул нигь рутлай дия увкуна.

Мукунмасса аваза бувтунни вай гьантрай коронавирусрал. Бумунил ялунгу ххи буллай, бувагу бакъамургу усттарну ляхъан буллай, къашавайминнал чIарав цивппа бивкIсса кунма, булувкьуну бур агьали бала- мусиватсса иширттая гъалгъа тIий ва социал сетирдай чичлай. Ца вих къахьурча, ца вих анну чичлай бур варсагъру.

Дагъусттаннал Муфтиятрал маслихIат бунни, байтурмансса коронавирусрал хIакъиравусса аваза гьаз къабуллай, дуван багьайсса диндалул аьдатругу , дуаьрдугу, чарабакъашиву дакъа чIявусса агьали батIлатIисса кIанттурдайн къазанан ва дагьайкун профилактика дуллан. Мукунма республикалул мизитирттавусса имамтурайн тапшур бунни нюжмаркьинирдай чаклил чIун лахъи дуккан къадуллан ва чара бакъа мизитирттавугу марцIшиврул ялув бацIан, чIун- чIумуй дезинфекция дуллай. Муфтиятрай зузи дунни агьалинал къювусса суалла­хьхьун динчитал ва хIакинтал жавабру дуллантIисса телефон­гу, («горячая линия»): 56- 14- 40.

Ххирасса буккулт. Аьрасатнаву, мукунма хасну жучIава Дагъусттаннайгу властирдал заллухъругу, хIакинталгу, шаймур буллай, ялув бавцIуну бур, азар ппив хьун къаритансса мурадрай. Яла аваза бутлатимур, къа­ххуймур ва къахъинмур- инсантуравун вас- ццах бутаншиврулсса информацияр.

Вирусран ххуллу кьукьинтIиссар, зана къадикIай ххуллийх азаргу тIайла дуккантIиссар. Хъама къабитай ттун ца Ххувшаврил байрандалий кьурчIину дяъвилия гъалгъа тIутIисса аьраличу ветераннал цала ихтилатрал ахирданий увкуна: «Дунияллун – дакьаву, дяъвилун – пIяв!» — куну. ТIайламур ччарчарив, «пIяв» тIисса мукъун кIанттай оькки махъ ишла бувна ветераннал. Амма тай аьратталсса хавардал хъирив дурсса ссуг танал мукун хIазну зумух ларсунахха циняв тяхъа-таза бувккуна. Тай махъру тикрал буллай, «дунияллун – дакьаву, вирусран- пIяв» учинну жувагу.

ЦIуллуну битаннав, Аллагьнал бурувччуну лякъиннав!

Читайте также: