Цалла буттал шяраваллил къайгъулий

[dropcap]Л[/dropcap]аргсса шинал ахирданий МахIачкъалалив бавтIун бия Шахьуйннал шяраваллил жагьилтал, «Шахьуйми» тIисса фондрал

каялувшиндаралу махъсса кIира шинай дурмунил ва ялунсса шинал данмунил хIакъиравусса ихтилатру буван.

---

Бадрижамал Аьлиева
БатIаву декабрьданий даврилгу дия цилла мяъна – ванияр 2 шинал хьхьичI, 2017 шинал, декабрь зуруй, шяраваллил лавгмунил, хIакьинумунил ва гьун­ттий бучIантIимунил буруккин­ттарайсса жагьилтурал сипталийну сакин бувссар «Шахьуйми» тIисса фонд.

Дайдихьулий ххал дурна шяраваллил тарихрава уттинин къакIулну бивкIсса затру ялун личин баву мурадрайсса аьрххилиясса ролик. Му ххуллух Ла­ккуйн бивссия профессор, тарихрал элмурдал доктор, ДГУ-лул преподаватель АхIмад Кьурбанов, фондрал члентал Аьбдул Аьлиев, Зураб Аьлиев, шяраваллил хъунисри Жавраил Кьурбанов ва Чавтара Къандаев. Муния махъгу хьуссия шяравунсса экспедицияртту, аьра­бист Тимур Айтберов, тарихчи Илияс Къаяев, цIанихсса архитектор Камил ЦIунтIаев ва цаймигу инсантал хIалассагу.

Ми бивссия шяраваллил хьхьи­чIазаманнуцIун бавхIусса личIи-личIисса кIанттурдайн: 20-мур ттуршукулул дайдихьулий, цайми кIанттурдай кунма, аьрщаращал кьа бувну, лекьа-пIякьу хьун бувсса мизитраяр хьхьичIвагу цамур мизит бивкIсса кIанайн – утти, вай жагьилтурал хIарачатрайн бувну, шяраваллил инсантуран Кьулла-Мизит тIий кIулсса, бивссар шяраваллил хIатталлив, имам Шамиллул наибну ивкIсса Шагьумилав тIисса шахьуйричунал гьаттайн. 1877-ку шинал Да­гъусттаннай хьусса восстаниялий лакрал бахьттагьалтрал бакIчину ивкIун ур Шагьумилав ва, виричунал кунна, жангу дуллуну дур. Бивссия мура чIумал жанну дуллусса кIия цаймигу шахьуйричунал гьаттардийн. Аьрабрая таржума дурссия шяравусса хъинну хьхьичIавасса буркIунттайсса, кIалазурттайсса чичрурду.

Вай ишру дакIнийн бивчуна батIаврий АхIмад Кьурбановлул. Ванал мукунма тавакъю бувна шяраваллил инсантурахь, Хъун дяъвилий талай бивкIсса цала буттахъаясса, ттаттахъая­сса, махъсса гъанчунаясса гьарта-гьарзасса информация булун, шяраву аьрали славалул музей буваншиврул ва лугу буккан баншиврул.

[dropcap]В[/dropcap]а кьинисса батIаврий, лавай кIицI лавгсса хъиривлаяврил экспедициярттая байбивхьуну, хьуна чIявусса ихтилатру, уттинин дуван хъирив лавмуниясса ва дуван дакIниймуниясса.
Шяраву цIуну буллай байбивхьусса мизитрал давуртту ссайн дирну дуссарив бувсуна МухIаммад-хIажи Сагидовлул. ЦIанасса чIумал мизитрал цалчинсса зиву щаллу шавай дур.
«Лакрал лига – 2019» тIисса цIанилусса жагьилтурал дянив­сса футболданул бяст-ччаллай жагьилтурал дурсса гьурттушиндарая бувсунни Шахьуйннал командалул капитан Руслан ЖахIпаровлул. Шиккува кIицI лаган, тарихраву цалчин гьашину ва команда дирссар финалданийн.
Зураб Аьлиевлулмур ихтилат бия Шяраваллил кьинилийн багьайсса, му так гьурра-гьайталийну, балай-гьалайрдайну къаларгна, мяйжаннугу шяраваллин мюнпат буну кIицI лаган аьркиншивриясса.

[dropcap]Б[/dropcap]атIаврил ахирданий личIи-личIисса наградартту дуллуна шяраваллил оьрмулуву хьхьи­чIунсса гьурттушинна дуллалиминнан: шяраваллил командалул ца яла хьхьичIунма болельщик Аьлил МахIаммадовлун, командалул вирдакIран ккаллисса Зураб Аьлиевлун, Расул Аьлиевлун, Нурулислам Къандаевлун, Руслан ЖахIпаровлун, вратарь Аьлил МахIаммадовлун, командалул хьхьичIунсса гьур­ттучи Муслим МахIаммадовлун, Нариман ХIажимиевлун, чIава футболистътал Аьвдул Кьурбановлун, ХIасанхIусайн Аьлиевлун, шяраваллил фондрал дуллалисса давурттаясса роликру ласласисса гьунар бусса оператор МахIаммад Гъазиевлун ва м.ц.
Фондрал ванияр тиннай дуллан дакIнийсса давурттал сияхI лахъир. Жувагу бацIанну миннал чIарав ва миннал дуллалимуницIун чIа учинну тIайлабацIу.