[dropcap]Ч[/dropcap]Iярусса шай Миллатирттал культуралул музейраву мероприятияртту, выставкартту дикIу, презентацияртту дикIу, художниктуращалсса хьунабакьавуртту дикIу.
Уттигъанну хьусса батIавугу дия жагьилсса, та-бунугу цIа ларгсса архитектортал ва художниктал хьунтIисса студентътурал хIадур дурсса практикалул конференциялун хасъсса. Гьурттуну бия шикку ДГПУ-лул архитектуралул, технологиялул факультетирттай ва ДГТУ-лул художествалул ва графикалул факультетрай дуклакисса студентътал.
З. АьбдурахIманова
Студентътурал шикку бувсса лекциярттава ттун чIявусса затру бавуна ва мудан ттула итталусса затирдая къакIулмур кIул хьуна. Шиккун ттуйн гьуртту хьунгу оьвкуна ДГТУ-лул архитектуралул факультетрайсса Дизайнрал кафедралий зузисса Гъумучатусса Шамиллул душ Парамазова Асиятлул.
Магьирлугърал ккураннаву зузиминнан ванил цIа ххуйну кIулссар, гьунар бусса заргал, художник, дизайнер хIисаврай. Вания, хьунагу бавкьуну, гьарта-гьарзану цамур чIумал бусанну.
Студентътурал цала докладирттаву аьлтту дурна личIи-личIисса заманнай архитектортурал, художниктурал ва дизайнертурал цала пишалуцIун психологиялул элмулийнгу чул бивщуну дуршиву давуртту.
Мисалдаран, дурцуна вайннал жула шагьрулул кучардайсса цIанасса рекламарттал, цурда аьмсса чIалачIиндарал ва цIуну дурсса къатрал аьмсса тагьаргу. ЧIявуя студентътурал, ялун хьунтIисса архитектортурал ва дизайнертурал, жула шагьрулуцIун бавхIуну, бакIраву ва дакIниву хIасул хьусса хияллу ва асардугу. Ччайгу бия жула шагьрулий та-бунугу вайннал дакIниймур бартлавгун. Хьунхьуви тIисса умуд бишинну жувагу.
