Декабрьданул 20-23-нний «Одиссей» тIисса бигьалагай базалий хьунни Щалвагу Аьрасатнал шяраваллал жагьилтурал форум.
Микку гьуртту хьунни 150-нния ливчусса жагьилтал: Ухссавнил Ккавкказуллал аграр вузирдал студентътал, аспирантътал, паччахIлугърал властрал органнал вакилтал ва цаймигу.
ХIасан Аьдилов
[dropcap]Ф[/dropcap]орум тIивтIунни ДР-лул Шяраваллил хозяйствалул ва бакIлахъиялул министр Абзагьир ХIусайновлул. Мунал тIимунийну, цIанасса агьаммур масъалану хъанай бур жагьилтал кIул баву хIакьинусса паччахIлугърал политикалущал. Му политикалул мурадгу бур билаятрай хъанахъисса иширттавун жагьилтал кIункIу баву, мукунма шяраваллавугу. Жагьилсса ник хьун аьркинссар шяраваллил давуртту щирикIин даврил сиптачиталну.
[dropcap]Ш[/dropcap]яраваллал жагьилтал лихълан къааьркинссар шагьрурдайн, даву дакъа ливчIминнал кьюкьригу гьарта дуллай. Ми зун аьркинссар шяраваллаву хъу-лухччинул давурттаха, ризкьи ябаврил иширттаха. Ми давурттаха зузиминнан паччахIлугърал чулухасса арцуйнусса кумаг буллай бур. Министрнал бувсунни шяраваллил хозяйствалуву зузисса жагьилсса ишбажаранчитуран паччахIлугърал буллалисса кумаграя.
[dropcap]М[/dropcap]унал тIимунийну, хIакьину паччахIлугърал тамансса кумаграл идарартту (институтру) дузал бувну бур. Ччима жагьилнаща бюхълай бур цалла бизнес дайдишин аграр бутIуву. ПаччахIлугърал цIанасса ппурттуву хъуннасса къулагъас дуллай бур шяравалу шагьрулул даражалийн дуцин. 2020 шинал Аьрасатнаву щурунтIий дур муниха зунсса федерал программа.
Декабрьданул 24-нний хьунни му форумрал хIасиллая бусласисса пресс-конференция. Форумрал лагрулий кьамул бувсса хIукмурдая бувсунни Абзагьир ХIусайновлул ва форумрал сакиншинначи Жамила Мелесовал.
Ялунсса шинал зузи дантIисса программалий ккаккан бувну бур яхьунсса къатта ласунсса багьлул 45% лахъантIий бушиву паччахIлугърал. Му чIумал лас, ягу щарсса зун аьркинссар шяраваллил хозяйствалул даврий. Министрнал бувсунни мукунма цIуну байбихьлахьисса фермертуран грантру ва Агростартапру дуллалишиву. Гьашину ми ласуншиврул чирчуну дур 160 заявка, кумаг бувну бур 50 инсаннан.
Аьщу-ххуттай бавцIусса ихтилат бунни «Финанс-груп» центрданул директор Жамила Мелесовал.
Муния махъ пресс-конференциялул сакиншинначитурал жавабру дуллунни журналистътурал суаллахьхьун.
