ПасихIсса мазрал минахуртурансса бахшиш

[dropcap]В[/dropcap]ай гьантрай МахIачкъалалив луттирду ххираминнан ххуйну кIулсса «Арбат-медиа» супермаркетрай «Русский язык.

Твоя грамотность в твоих руках» тIисса луттирал автор, Сяид Илиясовлущалсса хьунабакьаву хьунни (ва жула Сиражуттин ва Мариян Илиясовхъал арснал Мираблул арсри).

Залму АьбдурахIманова
[dropcap]В[/dropcap]а лу итабавкьуну бур «АСТ» тIисса басмаханалул сипталий. Лу итабакьин савав хьуну бур дуклаки оьрчIан, студентътуран, укунмасса халкьуннан гъалатIру бакъа бигьану ишла дан шайсса оьрус мазрал кьанунну дурчIин дурсса Сяидлул сакин бувсса «GRAMOTARUS» («ГРАМОТАРУС») тIисса блог.

Ва иширая жул кказитрай хьхьичIвагу чивчунугу буссия. «АСТ» басмаханалул, авторная ихтияргу ларсун, лу итабакьин цала бакIрайн лавсун бивкIссар.
Сяидлул шиккун бавтIминнахь бувсуна луттираву ишла бувну бушиву куртIсса мяъна дакъа­сса, жула къушлий, дустурал ва кIулминнал дянив шайсса ихтилатирттавасса укуннасса калимар­тту сакин дансса махъру.

-На нава юристра. Оьрус маз ишла байнигу дуссар цила ххуллийсса кьанунну. Закон кунна, жура ми кьануннугу дуру­ччин аьркинссар, жула чичрурдаву дикIу, ихтилатирттаву дикIу. Гьарцагу зат кIулсса, дурккусса инсан пасихIсса мазрай чичлангу, гъалгъа тIунгу аьркинссар. Га ганал ххуйшивугур, пишакар хIисаврай ганал даражалул лишангур»,- тIий ур Сяид.

Ванал блограл цIана усса ур щала дунияллиясса, оьрус маз ишла буллалисса 200 азараксса подписчик. Ва блог тIитIингу Сяидлун дакIнийн багьну бур 2013 шинал цала оьрус мазрал ЕГЭ дулун хIадур хъанахъисса чIумал. Блог щурущи бувну цаппара хIаллава «АСТ» басмаханалул вакилтал ванащал кIул хьуну бур. Утти вай кIилчинмур лу хIадур баврил ялувгу пикрилий бур.

Луттирдал ттучандалул менеджер Светлана Рустамовал бусаврийну, презентация хьун ца нюжмардул хьхьичI лавсун бувкIсса 100 луттирава 50-нния ливчу­сса халкьуннал машан лавсун бур. Аьмну луттирал тираж дусса дур 5000-ннийн дирсса. Машан ласун бюхъантIиссар луттирду «Арбат» ва «Территория» ттучаннай ва интернет-ттучаннайгу.