Декабрь зурул 28-нний ЦIусса шинал хьунийн МахIачкъалалив цIуну бакьин бувсса Хъун майданнив кIира агьамсса шадлугъ хьунни.

 Цалчинмуний Дякъилттаттагу, Марххаладушгу ва магьравасса цайми персонажругу гьурттуну, мюрщултгу, шагьрулул школар­ттал дуклаки оьрчIругу бавтIун, Хъун Ёлка тIивтIунни.

---

Залму АьбдурахIманова
[dropcap]О[/dropcap]ьрчIансса тяхъашивур­ттал хъиривмур шадлугърай, ДР-лул БакIчи Владимир Васильев, ХIукуматрал Председатель Артем Здунов, МахIачкъалаллал бакIчи Салман Дадаев, ванал хъиривчутал, республикалул министерстварттал, муниципалитетирттал бакIчиталгу гьурттуну, тIивтIуна цIуну бакьин бувсса хъун майдан.
ХIукуматрал къатрал хьхьичI республикалул ва хъуншагьрулул бакIчитурал ятIул лента кьувкьуну махъ циняр муниципалитетирттал каялувчитурал гьашину Хъун дяъвилий Ххувшаву ларсун 75 шин хьунтIисса юбилейран хасъсса «Аьпалул багъ – Оьрмулул багъ» тIисса акциялул лагрулий майданнив цала-цала шагьрурдал ва районнал чулуха цIа кусса 52 мурхь бувгьуна.

БакIчиталгу гьурттуну, лак­рал шаннагу райондалия бувкIсса делегациярттавухгу ДР-лул Халкьуннал Мажлисравусса жула депутатътал, Хъунисриннал советрал вакилтал ва жяматийсса ишккаккулт бия.
Шиккува кIицI лаган, Хъун майдан бакьин буллай сукку хьуну бивкIссар сайки кIива зурул хьхьичI. Майдан цIу буккан бансса давурттансса 350 миллион арцул жунма итабавкьуну бивкIссар, бахшиш хIисаврай, Москавуллал мэр Сергей Собяниннул. Мяйжаннугу, хъунна­сса даву дурну дия. Ялтту плитка дакьлай байбишин хьхьичI ба­ххана бувссар аьрщаравухсса щинал, канализациялул бургъурду ва ттукIрал ххаллу.

Утти майдан чIюлу буллантIиссар мурхьирдал, газоннал ва инттухуннай дугьантIисса тIутIал. Майданнив бивхьуну бия скамейкартту ва цIу бувну бия чирахъру лахъансса ттукIрал тталлу.
Майдан тIитIаврин хасъсса МахIачкъалаллал халкь ва хъамал барча буллалисса мукъуву ДР-лул БакIчи В.Васильевлул кIицI лавгуна гьарцагу шагьрулул дязаннивсса майдан га шагьрулул вирдакIну, лажинну хIисав хъанан бикIайшиву.
— Ялун нанисса 2020 шин жура хьунадакьинну ва майдан цIу бавриясса ххаришиврущал. Ва хъуннасса ва агьамсса даву жущара дан бювхъунни чIирисса чIумул мутталий.

Жула хьхьичI ттигу дансса давурттал сияхI хъуннасса дуссар. Гьашинусса шингу жура тIайла дукканну, республикалул маэшатраву хьусса хьхьичIуннайшивурттая пахрулий. Къабигьасса шин дия ва, амма хьусса ккаккиярттугу чан­сса дакъая. ЧIярусса районнай дурссар ва ттигу дуллантIиссар социал объектру ва щурущи дантIиссар агьалинан щуркIал хьунтIисса проектру,- кунни Рес­публикалул БакIчинал.
Хъирив махъру лавхъуна МахIачкъалаллал бакIчи Салман Дадаевлул, ДР-лул Хъунисриннал советрал хъунама Аьбдулла МахIаммадовлул ва м.ц Салман Дадаевлул, циняв барчагу бувну, кIицI лавгуна Хъун майдан бакьин баврия дайдирхьушиву МахIачкъалаллал кIичIиртту ва ххуллурду бакьин буллалисса чIяруми давур­тту ва ялун нанисса шиналгу ца яла лахъисса Имам Шамиллул цIанийсса проспект бакьин буллай байбишинтIишиву.

[dropcap]М[/dropcap]ахъру лавхъун махъ майданнив кIюрххияцIа ссапарданийн буккан хIадурну бавцIуну бивкIсса цIусса «Анавар кумаг­рал» машинартту ва дуклаки оьрчIру ххилансса школар­ттансса мюрщи автобусру кка­ккан дурсса районнайн ва шагьрурдайн тIайла бувккуна шадлугърал тагьарданий. ДР-лул БакIчинал бусаврийну, хъинну агьамсса журалул транспорт республикалуща машан ласун бювхъуну бур гьашину налогру датIаврил ккаккияртту лахъсса хьуну тIий.

[dropcap]Б[/dropcap]атIаврий гьуртту хьунни мукунма республикалул исполнител властьрал органнал каялувчитал, районнал ва шагьрурдал бакIчитал ва цаймигу.
Владимир Васильевлул бавтIминнахь барчаллагь кунни Дагъусттаннал цIаний дуллалисса давурттацIун кабакьаврихлу.
Ва хьунабакьаву хъанахъи­ссар мукьулчинмурну – ванияр хьхьичI республикалул каялувчи личIину хьунаавкьуну ивкIссар Зунттал, Централ ва Кьиблалул округирттал хъунисриннал советирттал вакилтуращал.

«Зул оьрмулул шинну хIи­савравун ларсун, хъунмасса хIурматран лайкьну буру. Официалну зул давурттал буржлувшиву ккаккан дурну дакъар, амма Дагъусттаннай хъунисриннал хъинну лахъа-хъунсса бур ва бивкIссар гьарцагу чIумал. Барчаллагь зун мунихлу.
— Ванал тIимунийну, давур­ттаву цIусса ххуллурду лякъаврийну бювхъуну бур бюджетравун налогру гьарзану дучIан дуллай, мунийну чIявусса социал масъаларттугу дузал буван. Цалва бувсмур тасттикь баншиврул субъектрал каялувчинал бувсунни региондалул лябуккулул проектру бартдигьаврийну хьусса хъин чулийсса дахханашивур­ттая – инсантал щинал дузал баврия, ххуллурду бакьин баврия, школартту баврия, шагьрулул лагма-ялттусса кIанттурдай къулайшиннарду дузал даврия .

[dropcap]Б[/dropcap]атIаврий махъру мукунма лавхъунни ДР-лул БакI­чиначIасса Хъунисриннал советрал председатель Аьбдулла МахIаммадовлул, ДР-лул Халкьуннал Мажлисрал Председательнал хъиривчу Елена Ельниковал.
ДР-лул социал-экономикалул лябуккулул 2019 шинал хIасиллая бувсунни республикалул экономикалул министр ХIажи Султановлул.
БатIаврий ихтилатру бунни цаппара районнал ва шагьрурдал бакIчитуралгу.