Декабрьданул 27-нний Дагъусттаннал Премьер-министр Артем Здуновлул республикалул цаппара министерстварттал ва
УФСИН-далул вакилтуращал цачIу ххал бивгьунни дуснакьирттал производствалул идарартту заказирттал щаллу баврил масъала.
ЦIанасса ппурттуву республикалул уголов-исполнител системалул дуснакьирттай бур сурсатру дуккан дайсса 6 идара. Микку дуллай бур тахта-тIаннул, муххал, янналул, уссал затру. Масалдаран, гьашину микку дуккан дурну дур 25 млн. къурушрансса сурсатру. ДР-лул УФСИН гьуртту хьуну бур 12 аукциондалий, ххув хьуну бур 4-нний.
ДР-лул промышленнострал ва энергетикалул министрнал хъиривчу Батир Эмеевлул тIимунийну, махъсса 4 зуруй чялишну зий бур системалул идарарттащал, чирчуну дур цаппара контрактру-кьутIирду 3,7 млн. къурушрансса. ЦIанасса ппурттуву УФСИН-далул идарарттай зий бур 500-нния ливчусса инсантал. Амма чIявусса дуснакьлувтал давурттал дузалну бакъар.
БатIаврий махъру лавхъунни Артем Здуновлул ва ДР-лул УФСИН-далул хъунама Андрей Поляковлул.
