Дуснакь бувми спортрал, магьирлугърал, кIулшивуртту ласаврил ва цаймигу мюнпатсса давурттавух хIала-гьуртту шаву
мурадрай январь зурул 4,5,6 кьинирдай 7-мур тIайла бацIан баврил колониялий (ИК-7) хьунни республикалул цIанихсса спортсментуращалсса хьунабакьавуртту.
Дуснакь бувминнащал хьунабакьин бувкIун бия личIи-личIисса Аьрасатнал ва Дунияллул даражалул бяст-ччаллаву ххувшавуртту ларсъсса машгьурсса спортсментал. Вайннал бувсунни цала оьрмулул ва спортрал ххуллия, хьунадаркьусса захIматшивурттая, дакIнийн бивчунни личIи-личIисса ягинсса бяст-ччаллу ва миннуясса асарду.
Спортсментурал мукунма маслихIатру бунни оьрмулуву хьунадакьлакьисса захIматшивурттава буккансса. Цалчинсса кьини дуснакьравуми гъирарай вичIи дирхьуну бия боевой самболул дунияллул чемпион, ММА-лул UFC-рал биялдарай буллалисса бяст-ччаллаву гьуртту хъанахъисса спортсмен Ислам Махачевлул, ушу-саньдалул Дагъусттаннал чемпион Мурад ЦIаххаевлул, закканттай бияврил спортрал мастер Руслан Аьбдуллаевлул, лачIун буккаврил спортрал мастер, Дагъусттаннал лачIун буккаврил чемпион ХIажимурад Рамазановлул, Дагъусттаннал Сборныйлул лачIун буккаврил хъунама тренер Арсен МахIаммадовлул, лачIун буккаврил Европанал чемпион, Дагъусттаннал лачIун буккаврил Федерациялул вице-президент МахIмуд МахIаммадовлул, куклу атлетикалул спортрал мастер хьунсса кандидат Мурад ВахIидовлул бусласимуних.
Хьунабакьаврий гьуртту хьунни Дагъусттаннал УФСИН-лул хъунаманал цалчинма хъиривчу, виваллил къуллугърал подполковник Расим Мехтиев ва дуснакьрал идарарттай законну дуруччаврил ялув ацIайсса прокурор Кьурбан Кьурбанов.
Вара кьини дуснакьравуминнал дянив хьунни лахъишиврий тIанкI учаврил бяст-ччал. Хъирив кьинирдай колониялийн бувкIунни Европанал ушу-саньдалул чемпион, ММА-лул боец Забит МахIаммадшарипов, ММА-лул Европанал чемпион, ушу-саньдалул дунияллул чемпион МахIаммад МахIаммадов, закканттай буккаврил спортрал мастер Рамазан ХIамидов, боевой самболул спортрал мастер Заур МахIаммадов, ушу-саньдалул дунияллул чемпион Артур Аьлибулатов, боевой самболул дунияллул чемпион Шамил Аьлибатыров, лачIун буккаврил спортрал мастер МахIаммадзагьир Исяев, лачIун буккаврил дунияллул даражалул спортрал мастер Аьли Исяев, ММА-лул дунияллул чемпион Рашид Юсупов, ММА-лул дунияллул Кубок лайкь бувсса Руслан Юсупов.
КIилчинмур кьини колониялий дуснакь бувминнал дянив хьунни ттуплий буккаврил бяст-ччал.
Цалчинсса кIану бувгьусса командалун буллунни занази кубок.
Хъирив кьини дуснакь бувминнал дянив турникрай гьаз шаврил бяст-ччал хьунни. ХьхьичIун ливчуминнан дуллунни грамотартту, медаллу ва нацIу-кьацIу. Бяст-ччаллаву гьуртту хьусса цинявннан идаралул хъуниминнал бахшишру дунни.
Дагъусттаннал УФСИН-лул пресс-служба
ХIадур бувссар
А. Аьбдуллаевал
