[dropcap]Я[/dropcap]нварьданул 13-нний Дагъусттаннал БакIчи Владимир Васильевлул республикалул журналистътал барча бунни Аьрасатнал Печатрал кьинилущал.
ХI. Аьдилов
«ХIурмат бусса Дагъусттаннал СМИ-лул зузалт, кказитру, журналлу, луттирду итабакьайми, полиграфиялул зузалт, пишалул ветерантал!
ДакIнийхтуну барча дуллай ура зул пишакаршиврул байран – Аьрасатнал Печатрал кьини.
[dropcap]А[/dropcap]ьрасатнал цалчинсса кказит бувкния шиннай ларгунни шанттуршлийсса шинну, амма кказитрай бивщусса бунияласса мукъул мяъна хIакьинусса кьинигу агьамссаннун ккаллинна дур. ТIайласса журналистика тIалавну диркIссар гьарца чIумалгу, амма цIанасса чIумал, тарихраву хьусса ишру бакъачIин кIура баенгу бувну, дунияллул ялув бухIлагьисса заманнай, му тIайласса мукъул дуссар ляличIисса мяъна. Гьамин зуцIа кIул хъанахъиссар инсантуран билаятрайгу, гьарца региондалийгу хъанахъисса иширттая.
[dropcap]З[/dropcap]ахIматри кьимат бищун Хъун дяъвилий Ххувшаву ларсун 75 шин шавриву СМИ-лул ва журналистътурал бугьлагьисса кIанттул. ХIакьинусса кьинигу республикалул журналистътал чялишну дахIаву дурну бур буккултращалгу, тамашачитуращалгу, «Интернет» ишла дуллалиминнащалгу, миннал пикри-зикрирду кIул буллай, ттизаманнул щилтагъсса иширттансса жавабру лякъин кумаг буллай, тIайламунил цIаний, хъиншивурттал цIаний жан дулун хIадуршиврул эбрат ккаккан дуллай.
[dropcap]В[/dropcap]а байран кьини ттун зухь барчаллагь чин ччай бур жяматралгу, властьралгу дянивсса гъалгъарду хъин чулийсса бушиврихлу, жу «цIун буллалисса» масъаларттая лабикIлай бакъашиврухлу.
ДакIнихтуну чIа тIий ура зун яргсса творчествалул чулухасса тIайлабацIуртту, цIакьсса цIуллушиву ва хъиншивуртту», — тIий бур барча баврил чагъарданий.
