Декабрьданул 28-нний ДР-лул БакIчи Владимир Васильевлул дунни региондалул каялувчиначIасса Хъунисриннал совет­рал батIаву. 

Совет сакин бувссар хъунисри республикалий бартбигьлагьисса яла агьамми масъалартту дузал баврил иширттавух гьурттуну бикIаншиврул.

БатIаврий гьуртту хьунни мукунма республикалул исполнител властьрал органнал каялувчитал, районнал ва шагьрурдал бакIчитал ва цаймигу.
Владимир Васильевлул бавтIминнахь барчаллагь кунни Дагъусттаннал цIаний дуллалисса давурттацIун кабакьаврихлу.

Ва хьунабакьаву хъанахъи­ссар мукьулчинмурну – ванияр хьхьичI республикалул каялувчи личIину хьунаавкьуну ивкIссар Зунттал, Централ ва Кьиблалул округирттал хъунисриннал советирттал вакилтуращал.
«Зул оьрмулул шинну хIи­савравун ларсун, хъунмасса хIурматран лайкьну буру. Официалну зул давурттал буржлувшиву ккаккан дурну дакъар, амма Дагъусттаннай хъунисриннал хъинну лахъа-хъунсса бур ва бивкIссар гьарцагу чIумал. Барчаллагь зун мунихлу.

— Ванал тIимунийну, давур­ттаву цIусса ххуллурду лякъаврийну бювхъуну бур бюджетравун налогру гьарзану дучIан дуллай, мунийну чIявусса социал масъаларттугу дузал буван. Цалва бувсмур тасттикь баншиврул субъектрал каялувчинал бувсунни региондалул лябуккулул проектру бартдигьаврийну хьусса хъин чулийсса дахханашивур­ттая – инсантал щинал дузал баврия, ххуллурду бакьин баврия, школартту баврия, шагьрулул лагма-ялттусса кIанттурдай къулайшиннарду дузал даврия .

БатIаврий махъру мукунма лавхъунни ДР-лул БакI­чиначIасса Хъунисриннал советрал председатель Аьбдулла МахIаммадовлул, ДР-лул Халкьуннал Мажлисрал Председательнал хъиривчу Елена Ельниковал.

ДР-лул социал-экономикалул лябуккулул 2019 шинал хIасиллая бувсунни республикалул экономикалул министр ХIажи Султановлул.
БатIаврий ихтилатру бунни цаппара районнал ва шагьрурдал бакIчитуралгу.