Дагъусттаннай экономика лядуккан даву мурадрай, Дагъусттаннай дузал бувну бивкIссар «Каспийск» ва «Дагестанские Огни» ТОСЭР-ду (территории опережающего социально-экономического развития).
ДР-лул Экономикалул министерствалул властрал мурадлувсса органнащал ва шагьрурдал администрациярттащал архIал дуллай бур ТОСЭР-данувун резидентътал кIункIу баврил ва миннул проектру дузрайн дуккан дуван кумаг баврил чулийми.
2019 шинал «Каспийск» ТОСЭР-данувун кIункIу увну ур ца резидент, ттигу 3 заявка дур ххал дигьин хIадурну, цинярда «Каспийск» ТОСЭР-данул резидентътурал сияхIрай бур Дагъусттаннал 6 идара (предприятие).
«Каспийск» ТОСЭР-данувун духлахисса «Уйташ» тIисса инвестициярттал площадка дурцIуну дур резидентътурал. Тикку буллай байбивхьуну бур пюрундалул ххаллал ва полиэтилендалул 2 завод (Каспийскаллал стекловолокнолул завод ва ООО «Дагполимер»). Мукунма буллай байбивхьуну бур пюрун шашайсса (стекловаренный) пачру буллай, стекловолокнорал текстил дулланшиврул.
«Каспийск» ТОСЭР-даний резидентътал битаншиврул, буллай байбивхьуну бур индустриал парк, «Дагдизель» заводрал бачIвасса кIанай, 11,17 гектарданий.
«Дагестанские Огни» ТОСЭР-данийн гьашину увцуну ур 5 резидент. Миннуву бур стройматериаллу дайсса, тахта-тIаннул тара дайсса ва цаймигу хIаллихшинну дайсса идарартту.
