[dropcap]Я[/dropcap]нварьданул 14-нний ДР-лул Премьер-министр Артем Здуновлул дунни Къизлардай ва райондалий агьали ххюттукалул азардал къашавай шаврил тагьардануцIун дархIусса батIаву.
ХI. Аьдилов
Республикалул ЦIуллушиву дуруччаврил министерствалул информациялийну, Къизлардал шагьрулул азарханалий уттубишин бувсса къашайшалтрал дусса дур ххютукалул азардал лишанну. Хъирив лавну, кIул бувну бур миннал щаракъалархъсса щин хIарчIун диркIшиву.
ДР-лул цIуллушиву дуруччаврил министрнал бусаврийну, ххюттукалул азардал къашавайми гьарза хъанай бухьувкун, Къизлардал централ азарханалий сакин дурну дур инфекцион штабрал даву. Дуллай бур эпидемиялийн къаршисса давуртту, инсантал ххал буллай бур ичIува, къашавай хьуми кIул буллай.
ДР-лул Роспотребнадзорданул каялувчинал хъиривчу Лариса Пантинал тIимунийну, шагьрулул цания ца насосрал станциялий щин санитар нормардацIун къадаркьусса дур, мунийну му станция лавкьуну бур. Къизлардайн МахIачкъалалия бучIан бувну бур лахъай азардал даву хъинну кIулсса хIакинтал, сакин бувну бур духтуртурал ва фельдшертурал 16 бригада, ичIунмай занай, къашавай хьуми азарханалийн биян буллан. Мукунма дузал бувну бур анаварсса кумаграл 2 бригада.
