[dropcap]Н[/dropcap]оябрьданул 26-нний «Дагестан» РИА-лий хьунни «Газпром трансгаз Махачкала» ООО-лул генеральный директор Александр Астаниннущалссал
пресс-конференция. Ва хас дурну дия ва предприятиялун 40 шин хъанахъисса агьамсса иширан.
З. АьбдурахIманова
МукьцIалла шинал хьхьичI щурущи бувсса хъун бакъасса предприятиялия хIакьинусса кьининин хьуну бур уттизаманнул оборудованиялулгу лащу-щаллусса, Ухссавнил Ккавкказуллал регионнай ца яла хъунмасса «Газпром» ПАО-лул ччуччиялул комплекс.
Пресс-конференциягу дайдирхьуна республикалул газрал аралия, жула шагьрурдайсса ва районнайсса газрал идарарттая бусласисса хъун дакъасса фильм ккаккан даврия.
2016 шиная шинай каялувчину зузисса Александр Астаниннул гьарта-гьарзану бувсуна цала предприятиялия ва мурадирттая.
— Гьарца шинах итабакьайсса газрал объем дур сайки 11 млрд.куб.м. Жул предприятиялийн багьайссар 12 филиал ва 5 магистралсса газопровод. Предприятиялул зузалт буржлувссар гьар шинах газ нанисса бургъурдал, станциярттал ялув бавцIуну бикIан, аварияртту хьуни, анаварсса мутталий хъирив бувккун, агьали авара къахьунну бакьин бан ва гьар кьини республикалийсса газрал сетьру цукун зий дурив ххал дуллан. Шиккусса оборудованиягу ттизаманнул зумунусса, тIабиаьтран зарал ва зузалтран захIмат-жапа къахьунну зузисса, хьхьичIунсса оборудованияр, — куна директорнал.
Жула республикалул газрал аралул тарих байбивхьуну бур 1979 шинал МахIачкъалалив цалчинсса газопроводрал станция тIитIаврийну. 1980 шинал «Моздок-Казимагомед» ва «Макат-Северный Кавказ» магистрал газопроводру бувцуну, Избербашрай ва Къизилюртлив компрессорданул станциярду бивхьуну бур. Укун, шиная шинайн тIий, станциярдугу чIяву хъанай, предприятиялул гужгу, цIакьгу ххи хъанан бивкIун бур. ХIакьину ва республикалий 1800-ннийн бивсса халкь зузисса предприятие хъанахъиссар.
Александр Астаниннул кIицI бувна, «Газпромрал» аьдатрайн бувну, цалмур предприятиялулгу хъуннасса къулагъас душиву республикалийсса рахIму-цIимилул, чирилунсса давурттах. Гьарца шинах укунсса давурттан вайннал 2 миллиондалийн дирсса арцу харж дайсса дур. ХъунмурчIин вайннал къулагъас дувайсса дур оьрчIал къатрах, культуралул идарарттах, мушакъатсса инсантурах, аьрали ветерантурах, захIматсса иширттахун багьсса халкьуннах.
«Газпром трансгаз Махачкала» предприятиялун 40 шин хъанахъисса юбилейрал мажлис хьунтIиссар декабрь зурул хьхьичIсса гьантрай.
