Агьалинахсса аякьа

Вай гьантрай агьалинащал хьунаавкьунни АьФ-лул ПаччахIлугърал Думалул депутат Аьвдулмажид МахIрамов.

Имара Саидова
Ва ххуллух депутатнал кьамул унни 5 инсан. Лаващиял райондалия­сса Шарапуттин ХIусайнов увкIун ия ряхрахъул шиннардий азурда увсса масъалалул ялув. Шарапуттиннул бувсунни цалла сакин дуллалисса предприятиялух банкрая 8 миллион арцул кредитрай ласлай ивкIшиву ва ми арцу цалла счетрайн уттигу дучIан дурашиву. Ванал фирмалийн гьан дурсса арцу дусса дур цамур фирмалийхчIин ларсун. ШарапуттиннучIан арцу дирну дакъар, амма кредитрал бурж тIурча, 11 миллиондалийн лавхъун бур.

Хъунзахъиял райондалиясса Ма­хIаммад­наби Жамалуттинов увкIун ия, ххуллу бакьин бан кумаг бара тIий. Ва цувагу тIайла увккун ия Хъунзахъиял райондалиясса 13-хъул шяраваллил жяматирттал цIания. Вайннал масъала бия ТIулух-Харахи шяраваллавухсса ххуллу бакьин баврил хIакъиравусса.

Аьбидин Аьлиев увкIун ия Камбоджалий хьунтIисса ментал арифметикалул олимпиадалий цала арс гьуртту хъанай ушиву бусан. Ванал арс Аьрасатнаву хьусса олимпиадарттай уттинингу цимилгу ххув хьуну ур. Ва ххуллух чил билаятрайн арс тIайла уккан­сса каши цала кулпатрахь дакъашиврийн бувну, чIарав бацIира тIий ия.
ЦачIанма ва кьини бувкIсса цинявппагу агьалинал масъаларттал хIакъираву ккавккунни хасъсса маслихIатру ва ми дузал баврил ялув бацIаву тапшур бунни цала кумагчитурайн.