Оьмарил арс Оьмариев Ибрагьинхалил
Октябрьданул 29-нний, оьрмулул 82 шинаву, аьпалувух ивхьунни цIанихсса чарил ва тIаннул усттар, Оьмарил арс Оьмариев Ибрагьинхалил.
Ибрагьинхалил увссар 1937 шинал Хъусращиял шяраву. 1943 шинал нинугу ахиратрал хьуну, дяъвилийн увцусса ппугу зана къавхьуну, чIавасса оьрмулий, цала хъунама уссищал ва ссищал, щала ятин хьуссар Ибрагьинхалил.
Хъуна хъанай ивкIссар ЧIяйннал шяравусса детдомрай уссищал ва ссищал. Жагьил хьуну махъ цалва маэшатрал хъирив лавгссар Ураллайн, Свердловскалийн, тIаннул давурттай зун. Ва ия Заннала усттарну ляхъан увсса инсан.
ЦIанихсса усттар хIисаврай, Хъусращиял шяраву дакъагу, ванал дурсса къатри дуссар Ккуллал ва Лакрал районнал цайми-цаймигу шяраваллаву. Къатри дакъассагу, ванал бувайва ламурду, ххуллурду. Колхозрал ятту букьай чIумалгу ванащал лаяйсса къаикIайва. Ятинну хъуна хьуну ухьурчангу, захIмат ххирасса, зирангсса, зий акъацIайсса адимина уссия Ибрагьинхалил, бунагьирттал аьпа биву, алжаннул ххари иву.
Шяраву ххаллилсса къатригу дурну, кулпат Булбуллущал ххюва оьрчIгу хъуни бувну, оьрмулул ххуллурдайн бивчуссия ванал.
Ибрагьинхалиллул бивкIулул кьурчIишиву кIидачIлай, жижара буллай буру кулпат Булбуллухь, оьрчIахь, душваврахь, вайнная бивзсса наслулухь, щалагу агьлу-авладрахь. Алжаннул ххари аннав, гьав нурданул дуцIиннав.
Хъусращиял жяматрал цIания
Аьллахъал Асадуллагь
Хизрил арс Илиясов МахIаммад
Уттигъанну, оьрмулул 84 шинаву, аьпалул хьунни Ппалассуннал шяравасса ххаллилсса, жяматраву авкьусса чув, Хизрил арс Илиясов МахIаммад (Бариц).
Увссар МахIаммад 1935 шинал Ппалассуннал шяраву. ЧIаххуврайсса Уриннал шяраву 7 классгу къуртал бувну, буттал ссурахъил Грознайлив увцуну, гикку ванал къуртал бувну бур бухгалтернал ва щупирнал курсру. Аьрали къуллугъгу лавхъун, буттал шяравун зана хьуну, колхозрал машиналий щупирну зун ивкIун ур.
Ппаласмав цалчин машина бувцуну увкIма вари ивкIсса. 70-ку шиннардий МахIаммад цала кулпатращал ва мюрщисса оьрчIащал ивзссар чIявуну цала аьрххирду шайсса бивкIсса Бабаюртуллал райондалийсса КIамахъаллал ва Ппалассуннал къутандалийн. Колхозрал машиналий зунттал ва арнил ххуллурдайх ххулув, лачIа-къама ххилай, МахIаммадлул жяматращал архIал хъунмасса захIмат бивхьуссар.
Ванал цала кулпат Саниятлущал, хъунигу бувну, чивун буккан бувссар ца арс ва арулва душ.
МахIаммадлул бивкIулул кьурчIишиву кIидачIлай, дакIнихтунусса жижара буллай буру кулпатрахь, арс Русланнухь, душваврахь ва махъсса цинявппагу гъан-маччанахь.
Имандалий лавгун лякъиннав, цал рухI алжаннул ххари даннав. Махънал оьрмурдай барачат бишиннав.
Ппалассуннал
ва КIамахъаллал жямат
АьбдурахIманнул арс Маммакьурбанов ХIусайна
Октябрь зурул 29-нний, оьрмулул 88 шинаву ахиратрал хьунни дяъвилул ва захIматрал ветеран, иминсса хасиятрал ва яхI-къириятрал заллу, АьвдурахIманнул арс Маммакьурбанов ХIусайна.
1950-ку шинал ЧIяйннал дянивмур даражалул школалий 9 классгу къуртал бувну, зун ивкIун ур шяраваллил «ЯтIул Партизан» колхозраву. 1951 шинал армиялий къуллугъ бан увцуну, 3 шин ва 8 зурувун зана хьуну, зун увххун ур милицанайн.
1957-кусса шинал дуклан увххун ур Львов шагьрулийсса Пожарно-техникалул училищалувун. Мугу къуртал бувну, пожарный техникнал пишалий зун ивкIун ур республикалул виваллил иширттал органнай, 27 шинал мутталий къуллугъ бувну бур инспекторну пожарный охраналий, пожарный частьрал начальник хьуннин.
ХIусайнал аьмсса захIматрал стаж хъанай бур 64 шин. Ванал дяъвилул чIумал ва муния махъсса шиннардий бувсса захIматрахлу дуллуну дур «ЗахIматрал ветеран» ва «Хъун дяъвилул ветеран» тIисса цIарду, 13 медаль ва чIярусса хIурматрал грамотарду.
ХIусайнал ва ванал кулпат Уммукулсуннул, 51 шинай цачIу яхъанай, хъунигу бувну, ларайсса кIулшивурттугу ласун бувну, къатрал бувну бур ца арс ва кIива душ.
Ажалуннин мажал къабикIайссар учай: мадарасса хIаллай къашавайгу ивкIун, аьпалул хьунни ХIусайна. Къашавайссаксса ванах лайкьну къулагъас дунни лякьлул оьрчIал.
Ванан къабуллуну ливчIсса оьрмулул гьантри махъ ливчIсса кулпатран, гъан-маччанан булуннав.
ХIусайна аьпалухьхьун лагаврил кьурчIишиву кIидачIлай буру ванал арснахь МахIаммадлухь, душваврахь Динарахь, Разиятлухь, куявтурахь, гъан-маччанахь.
Алжаннул ххари аннав, гьав нурданул дуцIиннав.
ЧIяйннал жяматрал цIания ТIалхIат АьбдурахIманов
Хъуннасса кьурчIишивугу кIидачIлай, жижара буллай буру жущалва зий бивкIсса Оьмариева Аминатлухь, ванил нину Булбуллухь, агьлу-авладрахь, вайннал аьзизсса ппу, кулпатрал магъи
Ибрагьинхалил
аьпалувух ишаврийн бувну. Махънал оьрмурду лахъи баннав. Буттал, ласнал рухIгу алжаннул ххари даннав.
«Илчи» кказитрал зузалт
