Ххуйсса чIугу, такьвагу ванийн ирсирай дирну дур

[dropcap]О[/dropcap]ктябрь зурул 25-нний Ма­хIачкъалалив «Мечта» тIисса банкет залдануву хьунни лакрал балайрду ххираминнан­сса мажлис. Халкьуннан нукIува бусрав хьусса, гьунар бусса балайчи Зарипатлул тамашачитурал тавакъюрайн бувну дунни ца уттигу концерт. 

Тамашачитурал щапI увкуну бувцIуну бия зал. Концертрал сий хъиннура гьаз дунни Зарипатлул ссил, ДР-лул лайкь хьусса артистка, цIанихсса балайчи Загьидат Муслимовал.


Имара Саидова
[dropcap]З[/dropcap]арипат цалчин сахIналийн буккайхтува тамашачитурал, лагма лавгун, хъатру ришлай, ва тIутIавун багьлаган бувна. Цу­ппагу, муданма кунма, цIу буну, ссурухIи хьуну ларххун бия.
Ххуйсса чIугу, такьвагу Зарипатлун цила ниттия ва аслийсса лакку балайрду тIунма буккан бувсса ссия Загьидатлуя дирхьунссар. Вайннал ни­ттил Бахъил Хъусращиял шяраву цIанихну балай учаврил сий ларгун дуссар.

Зарипатлул цилва цалчин­сса балай увкуну бур ца ппурттуву ссил Загьидатлул концертрай. Муниннин, цивува балайлул гьунар бунагу, пахру-ххара бакъашиврул, сахIналийн буккан бан хьуну бакъар.
«Цалчин сахIналий балай увкуну, тамашачитурал хъатру ришлай кьамул бувния шихунмай балайрду тIунсса гъира багьуна, — тIий бур Зарипат.
Цила гьунардануцIун, дакI-аьмал хъиншиврийну, иминсса хасиятрайну ва хIал бакьаврийнугу ххирасса бур ва инсантуран.

[dropcap]З[/dropcap]арипатлул чIарав бацIан, ванил мажлис лахъа-хъун бан бувкIун бия Дагъусттаннал машгьурсса артистътал: Рашид Ба­гъатаев, уссурвал Руслан ва Ислам Рамазановхъул, Жамиля Аьбдуллаева, Ссамад Буттаев, Ямлихан ХIажиев, Аймисай Абуева, Залихха ва цаймигу. БувкIун бия даргиял миллатрал цIанихсса балайчи Зульфиягу.
Мажлис усттарну бачин бувну ия ДР-лул культуралул лайкь хьусса зузала Супиян Оьмаров. Ххуйъя, ххаллилъя концерт. Му къуртал хьуну махъгу тамашачитал ппив хъанай бакъая, ришлай бия Зарипатлущал дакIний личIансса суратру.