КIулливкьай вин нисирал хасият ягу къакIуллив?

[dropcap]М[/dropcap]оцарелла, грюйер, рак­лет, камамбер, качотта, буратта, брюност, монтазио ва цаймигу нахIура-нахIусса палангнал ва италиянал нисру щалла дунияллийх машгьурсса,

ми дувайсса ва ядуллалисса куц ккаккан гьан туристурал чIярусса арцурду харж дувайсса нисрур.

---

Италиянаву, Палангнаву, Швейцариянаву, Голландиянаву нис дуваву ккалли­ссардур ирсирай нанисса хъунна­сса культуралун. Вай билаятир­ттал маэшатрал гьану бивзсса туризмгу цIакьну дархIуну ду­ссар «нисирал культуралуцIун». Вана укун, нисирал тарихрая, миннул журардая, хасиятир­ттая ва утти цанма ххира хьусса пишалия бусласисса тIааьнсса ихтилат хьунни ттулгу уттигъанну жула хъуншагьрулий ца 4 шинал хьхьичI тIивтIусса «Учхоз продукт» тIисса нис дай къушлий (сыроварнялуву) зузисса жула лакку оьрчI ХIасанбагов МахIаммадкариннущал.
Ва цуппагу бивхьуну бур ца яла ттунма ххирасса, хаснува ссутнил чIумал, мусивун бахьлавгсса, шагьрулух ябитан навагу кIункIу бувайсса, М. ХIажиевлул цIанийсса кучалий, Шяраваллил хозяйствалул академиялул чIарав.

[pullquote]Франциянал нисирал специалист махIаттал увну ия, ссиллукьул чIапIавугу дархIуну, дувайсса жула яттил нисирал.[/pullquote]

Нис дувай къатта щурущи бувну бувну бур академиялул ректор Зайдин Жамбулатов студентътурал ххалдиргьусса проектрал чIарах ацIаврийну. Нис вайннал дайсса дур Учхозрайсса цала академиялул хозяйствалуву ябуллалисса оьллал накIлия ва мукунна накI ларсун бучIайсса бур Избербашрая арх дакъа­сса оьллал фермалиягу. Нис да­къасса, вайннал итадакьайсса дур барт, йогурт, тартнакI, кIурх лирчусса къалмул ччатI ва цаймигу натуралсса бакIлахъру.
МахIаммадкарин увну ур Хъунайннал шяравату­сса Аьвдуллагьлул ва Башаратлул кулпатраву Ташкантлив. Ванан ххюра шин хьусса чIумал, нину-ппу махъунмай Дагъус­ттаннайн зана хьуну, буттал шяраву миналул хьуну бур. Хъунайннал школагу къуртал бувну, 2010 шинал МахIаммадкарин дуклан увххун ур Шяраваллил хозяйствалул академиялувун, га ппурттуву дахьва цIуну тIивтIусса ветеринар санэкспертизалул факультетрайн.

[pullquote]Тайннан ххишала дакъа ххирар някI-щюллисса мяххи даркьусса нис, жува тIурча, миннуйн ссунтIвагу къаучару.[/pullquote]

Ши­ккун дуклан уххавугу жагьилнал хьуну дур цакунусса, дакIний-мазрай да­къасса. Школалийва ванал хиял бивкIун бур Рязаннал аьрали университетравун дуклан уххан­сса. ЧагъардацIун дархIусса хIакъи-хIисавртту савав хьуну, чIал хьуну лякъайхту, гъан-маччанал маслихIатрайну ва вузравун уххан пикри хьуну бур. Дуккавривугу хIарачат бу­сса, ххуйсса тарбиягу дусса студент факультетрал каялувчитуралгу цала къулагъасрайн лавсун ур. Мукьилчинмур курсирай дуклакисса чIумал ванайн оьвкуну бур нис дувай къатлуву зун. ЦIана МахIаммадкарин шиву архIал зузиминнан ккаллийну ур акъа чара бакъасса пишакарнан.

Вайннал мазрай тIийкун, нис шахьай пиша магьир бан ларгмур шинал ва тIайла ув­ккун ивкIун ур Москавлив Италиянавасса цIаларгсса нисдувултрал семинардайнгу. Шиву зузи­сса жагьилсса пишакартуран за лахьхьин бан МахIачкъалаливгу увкIун ивкIун ур Палангнаву ва жула билаятрайгу цIа дурксса нис шахьу (сыровар) Александр Пелисье. Дагъусттаннал шяраваллил хозяйствалул цIания МахIаммадкариннул дурсса нис дуккан дайсса дур гьар шинах Москавлив ВДНХ-лий тIитIайсса «Мусил ссут» тIисса хъуннасса аграр выставкалийн. Гьарца аьрххилия вай зана шай­сса бур медаллащал ва цаймигу бахшиширттащал. Утти­гъанну, октябрьданий, хьусса ирглий­сса мура выставкалия вай мукьра медальданущал зана хьуну бур. МахIаммадкарин, шикку зий унува, дуклай ур аспирантуралувугу.
— МахIаммадкарин, вил шиву зий 4-5 шин хъанай дур.
Вийн утти «нисирал эксперт» учингума бучIир.

[pullquote]ХIасил, Европанал билаятирттал нис каш-куш чIявусса, хъунмасса хIаллай диян дитлатисса дур. Жула тIурча, татан дурну, цIугу бивчуну, цаппара хIаллава цIил щинаву дишай.[/pullquote]

Винма бувчIуссаксса, ци тапаватшиву, ци ляличIишиву дур жула цIа ларгсса дагъусттан нисирал ва паланг, италиян нисирал дянив?
— Эксперт ттуя ттигу хьун увар, амма нисирал хасиятру къадурчIинсса хIал къавхьу­нни. Жул аралуву хъинну ишла­ссар укунмасса агьулдануву гьич такIуй ишла къабайсса махъру. Мисалдаран, «нис диян ритан», «нис дирну дур» ва цаймигу ляличIисса калимартту. Да­гъусттаннал нисирал – цила хасиятру, паланг-италияналмунил – цилами. Жула агьулданун ххирар цIу бювхсса, щутI лархъсса, вив аьгъушиврул ккузри-ккузри багьсса нис. Палангнан тIурча, хъинну ххирассар някI-щюллисса мяххи (плесень) даркьусса нис. Миннал дуссар нахIу хьуншиврул 3-4 шинай ца гьавалул тагьар дусса къатлуву кьаритай­ссагума нис. Жула кунна цIил щинаву ритайссагу дур, гьавалий лахъи лаган шиннардий кьаритайссагу дур. Италиянал агьулданун ххирар мяххи чансса кьянкьа нисру ва кIукIлу нисру.

Гайннал дунияллийх машгьурсса пиццардугу хъунмурчIин кьянкьа нис ишла дурну бувайссар. ЖучIара тIурча, някI лаглан диркIсса нисирайн ссунтIвагу къаучай. Амма жун паланг нис дуван лахьхьин бан увкIун ивкIсса Александр Пелисье махIаттал увну ия, зунттаву ссиллукьул чIапIавугу дархIуну, ядурсса жула яттил нисирал. ДакIний бур, нис дурхъун канай айишин хьхьичI, та мадара хIаллай нисирал кьункьая нахIала буллай, ссунтIа тIий авцIуну ивкIсса.

ХIасил, Европанал билаятирттал нис каш-куш чIявусса, хъунмасса хIаллай диян дитлатисса дур. Жула тIурча, татан дурну, цIугу бивчуну, цаппара хIаллава цIил щинаву дишай. Шиккун зун учIаннин, шяраву нис ниттил дахIлай, дуллай ххал хьурча бакъа, ттун къамуксса кIулссия личIи-личIисса билаятирттал нис даврил авадансса культуралул, аьдатирттал биялалийсса иш бушиву. Аьжаив­сса, дакIнил ласунсса диркIун дия «нисирал дуниял».

— Зу шикку, оьлил накI­лия дакъасса, ялагу ссал накIлия дувару нис?
-ХъунмурчIин жу дувару оьлил ва кьяцлул накIлия. Ца ппурттуву, опыт хIисаврай, дуллай бивкIру гамушрал накIлиягу. Проектрал дазурду гьарта-гьарза дуван бюхъарчан, пикрилий буру яттил накIлиягу дуллан. Нис жу дувайссар Италиянал оборудованиялий, санитариялул циняр тIалавшиннардугу дурурччуну. Буссар нис ядайсса, цила-цила температура, вивсса гьавалул кьавкь-атилшиву цалийн дурцусса кIива къатта (хранилище) – палангналми личIину, италияналсса личIину.

Цара-ца фермалия накI ларсун бучIарчагу, жу миннул хIалкьазиялул хъирив къалавну, багьаймур, аьркинмур кIул къабувну бакъа, нис дуллай къабайбишайссару. Жу шикку дувайссар чансса, амма качествалул лахъсса продукция. Жу жува Александр Пелисьел школалун ккалли бувайсса жула нис дувай къатлул хьхьичIва-хьичIсса мурадну хъанахъиссар, конвеерду ишла къадурну, дачIрасса каруннах нис дуваву.

— Инара цалчин ци нис дурссарив дакIний бурив?
— ДакIний буркьай. Ши­ккун зун увкIун, кIира-шанна нюжмардува дурссия цалчинсса ттула Качотта тIисса нис. Жул мазрай нис дурсса чIумал «родился сыр» учайссар. Мяйжаннугу, чIиви оьрчIаха лархьхьуну, гьантлия-гьантлийн диллай, тIин-тIааьн букIлайри нахIусса нис шайсса. ЦIана жучIа яла дирсса нис дачIи шин ххишалагу хьусса нис дуссар тиву дирхьуну. Дияйнийн дияншиврул ца шинай дитан аьркинссар.

— Барчаллагь, МахIам­мадкарин. Ина кунмасса, захIмат ххира­сса, захIматрал кьимат кIулсса жагьилтал жула дянив чан къабаннав. Хъунасса пишакар хьуну ккакканнав вияту!

Ижтилат бувссар
Залму АьбдурахIмановал