Ларгсса нюжмар кьини Дагъусттаннал паччахIлугърал университетраву зузими, дустал, гьалмахтал, шяраваллил агьлу бавтIун
бия 1-мур ЦIувкIратусса физикалул элмурдал доктор, академик ХIусайханов МахIаммадбаглул юбилей барча дуван.
ПатIимат Рамазанова
Университетрал проректор ХIасанов МахIаммадлул бувсуна ректор Муртазааьли Рабаданов даврил иширай Москавлив лавгшиву ва мунал цайнма тапшур бувшиву МахIаммадбаг Кьагьирович университетрал аьлимтурал советрай барча увантIишиву баян буван. Ванал бувсуна архIал зузиминначIагу, ректоратравугу, студентътурал дянивгу МахIаммадбаглул сийгу, хIурматгу бушиву, ва цал архIал ххуйсса аьлимчугу, преподавательгу ушиву.
Аьрасатнал элмурдал академиялул элмийсса хъиривлаявуртту дуллалисса федерал центрданул (ДФНИЦ РАН) хъунаманал хъиривчу, профессор Муртазаев Акайл, ва центрданул цIанияту барча уллалисса чагъар буллай, бувсуна МахIаммадбаг Кьагьирович мудангу элмулул хъирив агьнувасса, кIулшивуртту куртIгу, цIакьгу дуллай оьрму бутлатисса аьлимчу ушиву.
МахIаммадбаглул даврин лахъсса кьимат бишлашисса ихтилатру бувна профессор, физикалул электроникалул кафедралул хъунама Оьмаров Оьмардул, ректоратрал маслихIатчи, химиялул элмурдал доктор, профессор МахIаммадбеков Ухумааьлил, техникалул элмурдал доктор, профессор, информатикалул ва информациялул технологиярттал кафедралул хъунама, юбилярнал гъансса дус АхIмадов Сулайманнул, профессор, физикалул факультетрал кафедралул хъунама Садикьов Садикьлул, юбилярнал шяравучувтурал, профессортурал, академиктурал – АьбдурахIман Халиловлул, Рамазан Багатаевлул ва МахIаммад Рамазановлул, мукунма цаймигу бусравсса аьлимтурал, даврил уртакьтурал.
Дагъусттаннал ХIукуматрал ва БакIчинал администрациялул паччахIлугърал къуллугъралсса, кадрардалсса ва паччахIлугърал наградартталсса буллалисса управлениялул хъунама Артур Исрапиловлул, юбиляр барча уллай, кIицI лавгунни республикалийсса ва кьатIувсса шагьрурдайсса цIувкIул оьнийгу, хъиннийгу мудан цачIу бушавриву хъунмур бияла МахIаммадбаглул бушиву ва гьамин му ушиву цIувкIул цачIун бувай дякюру цIакьну ябуллалимагу.
Мариян Илиясовал цIанийсса «Дараччи» фондрал хъунмур Гульшан Хасаевалгу кIицI лавгунни МахIаммадбаг мудангу лакрал агьамсса иширттавух чялишну хIала уххайсса, лакравугу, чивугу махъ нанисса жяматийсса ишккакку, хIакьсса интеллигент, ларайсса мяърипатрал заллу, дакI-аьмал хъинсса инсан ушиву. Сайки циняв, ца зумату кунма, чIурчIав дуллай бия МахIаммадбаг так ххуйми хасиятирттал заллу ушиврий, давриву ва элмулуву итххявхсса аьлимчу ушивруцIун, дакI аьчухсса, инсаншиву дусса, чIарав ацIан чялишсса, хIал бавкьусса зунтталчу ушиврийгу, ххаллилсса ппу ва лас ушиврийгу. Махъругу цану, дакIругу цану лахъа-хъун унни цинявннан ххирасса аьлимчу, преподаватель, жяматийсса ишккакку.
Юбилейрал мажлис усттарну бачин бувну ия Дагъусттаннал культуралул лайкь хьусса зузала, юбилярнал шяравучу Супиян Оьмаров.
ЧIяруя МахIаммадбаглун ва кьини дуллалисса лайкь дурсса бахшишругу, чIявуя хIалалсса барчаллагьрал махъру тIутIимигу. Ванал юбилей уттигъанну дунияллийн увксса арснал оьрчIан МахIаммадбаглул цIа дизлазисса шадлугърайн тIайладацIавугу ккалли дуллай бия Заннал ва оьрмулул бахшишран. ЧIивитIу МахIаммадбаглуя тIайла хьуну, ххари улланнав ина наслулулгу, студентътуралгу, оьрмулулгу, МахIаммадбаг!
