Дагъусттаннал шагьрурдаву ца яла паракьатмунин ккаллисса Каспийск шагьрулул тарихравусса оь кьинирдавасса ца дур 1996 шиналсса
ноябрьданул 16-чинсса кьини – дазурду дуруччайминнал кулпатру ялапар хъанахъисса чIярузивурду дусса къатта пIякь учин бувсса кьини. Га чIумал оьрмулуцIа хьуссия 69 инсан.
Бадрижамал Аьлиева
Муния шиннай шагьрулий гьар шинах му кьини дакIнийн дутлатисса личIи-личIисса батIавуртту шайссар. Хьунни му вай гьантрай Каспийскалийсса Аьрасатнал халкьуннал аслийсса культуралул центрданийгу. Мунил директор Башикар Гадаевал дакIнийн бивчунни та кьинилуцIун бавхIусса кьурчIисса кIанттурду.
БатIаврий гьуртту хьунни шагьрулул администрациялул вакилтал, шагьрулул школалул учительтал ва дуклаки оьрчIру.
Му иширан хасну хIадур дурну дия выставка ва цинявнналагу цачIу ххал дувансса видеофильмру. Миккура хьуна ОьрчIал творчествалул центрданийн заназиминнал цалла карунних дирхьусса суратирттал выставкагу.
