Оьмарил арс Мусаев Давуд
Вай гьантрай жуятува личIи хьунни ххаллилсса инсан, яхI-къириятрал заллу, Хъювхъиял шяравасса Оьмарил арс Мусаев Давуд.
Давуд увну ур 1933-ку шинал, Хъювхъиял шяраву. Хъуна хьуну ур Гъумучиял детдомрай. Давудлул къуртал бувну бур сянаткартурал училище. Мунияр махъ цаппара шиннардий зий ивкIун ур Хъювхъиял шяраву. Яла, МахIачкъалалив ивзун, зун ивкIун ур 1-мур СМУ-лий, мунияр махъ зий ивкIун ур токсомотор паркраву, цал – бригадирну, яла – хъунаману. Давуд ия чIявусса захIмат ккавксса, цала захIматрал ва хIарачатрал гьаз увсса инсан. Шяраваллил жяматрал, кIулминнал дянив чансса бухьунссар инсантал ванал кумаг къабувсса.
Давуд ия дакIнил бутIа чумартну буллусса, тIул-тIабиаьтрал авкьусса адамина. Цала кулпат Хамислущал Давудлул, ххаллилсса тарбиягу дуллуну, цала-цала оьрмулул ххуллийн бивчуссар ххюва оьрчI.
Давуд аьпалул шаврил кьурчIишивугу кIидачIлай, жижара буллай буру кулпатрахь, оьрчIахь, арснал хъаннихь, махъсса циняв гъан-маччанахь. Имандалий лавгун лякъиннав, рухI алжаннул ххари даннав, махъминнал оьрмурдай барачат бишиннав!
Хъювхъиял жямат, дустал, даврил уртакьтал
АмирхIажинал арс Агъаев Серго
Вай гьантрай аьпалул хьунни Къяннал шяравасса ххаллилсса зунтталчу, АмирхIажинал арс Агъаев Серго.
Увну ур Серго 1955 шинал Къяннал шяраву. Къянив 8 классгу бувккуну, лавайми классирттаву дуклай ивкIун ур Вихьуллал дянивмур даражалул школалий. 1974-1976 шиннардий къуллугъ буллай ивкIун ур аьралуннаву. Аьралуннава зана хьуну махъ дуклан увххун ур Дагъусттаннал паччахIлугърал университетрал физикалул факультетрайн. Дуклай унува, архIала зий ивкIун ур СССР-данул Элмурдал академиялул Дагъусттаннал физикалул филиалданул институтраву. 1999 шиная шихунай зий уссия Ххуллурдал строительствалул 2-мур предприятиялий.
ДакI хъинсса, инсаннан ка-кумаг бан, чIарав ацIан хIадурсса икIайва Серго. ХIурмат буну ва бусравну икIайва архIал зузиминнал, дустурал ва жяматрал дянив.
Ванал ххаллилсса тарбия дуллуну цала-цала оьрмулул ххуллийн бивчуну бур кIива душ ва арс. Серго ахиратрал шаврил хъуннасса кьурчIишиву кIидачIлай буру кулпат Гулизардухь, арснахь, душваврахь, ссихь ва цинявппагу гъан-маччанахь.
Цал гьав нурданул дуцIиннав, алжан нясив баннав. Махънал оьрмурдай барачат бишиннав. Амин.
Къяннал жямат
Аьбдулкьадирдул душ МухIадова Заваният
Октябрьданул 12-нний аьпалувух бивхьунни КIямашрал шяраватусса иминсса зунттал хъамитайпа, ххаллилсса душварал нину, душварая бивзминнан ххирасса ниттил нину, Аьбдулкьадирдул душ МухIадова Заваният.
Заваният бувну бур КIямашрал шяраву 1941 шинал. Буттал шяраву байбихьулул школа, чIаххуврайсса ГьунчIукьатIув школагу къуртал бувну, дяъвилул шиннардил цаймигу оьрчIру кунма, чIивину бунува захIматрахун багьссар. Цуппа язи бувгьусса оьрмулул гьалмахчу, аьпабиву, жагьилнува аьпалувух ивхьусса МухIадов Сайдуннущал цачIун хьуну махъ биялсса захIмат бивхьуссар, дояркашиву дуллай, мукунма бетон бутIай заводрай зий, муххал ххуллул идаралий зий. Пенсиялийн бувккун махъгу буссия Заваният зий, цилва ятинтал хьусса душру хъуни буллай, минная бивзминнан кумаг-ка дуллай.
Чув, ци даврий зурчангу, Заваният бия хъинну хIал бавкьусса хъамитайпа. Ванил хIурмат хъунмая архIал зузиминначIа, чIахху-чIарахначIа, шяраваллил жяматрачIа. Дуллуна зузисса давурттая Заваниятлун бахшишру ва хIурматрал лишаннугу, ванил захIматран кьимат бишлай, дуллуссар медаллугу.
Аьзизсса нину яла ларгсса бивкIулул кьурчIишивугу кIидачIлай, жижара буллай буру душварахь — Ххадижатлухь, Минажатлухь, ПатIиматлухь, куявтурахь Нураттиннухь ва Аьбдулнасирдухь, душварая бивзсса наслулухь, агьлу-авладрахь. Ниттил рухI алжаннул ххари даннав. Зулва цинявннал оьрму лахъи баннав, ганил барачат махъ ливчIун лякъиннав!
КIямашрал жямат
***
Хъуннасса кьурчIишивугу кIидачIлай, жижара буллай буру жула хъинсса дус ва «Лакку билаятрал рухI» группалул администратор Разита Мушидовахь, ванил аьзизсса ппу
Давуд
аьпалул шаврийн бувну.
РухI хъинний дишиннав, оьрчIахьхьун, оьрчIал оьрчIахьхьун цIуллушиву дулуннав.
ИхIсандалул фонд «Лакку билаятрал рухI»
