[dropcap]С[/dropcap]ентябрь зурул 10-нний МахIачкъалалив ДР-лул Миллатрал политикалул ва диндалул иширттал
министерствалул, Дагъусттаннал Хъаннил союзрал сипталий хьунни 1999 шиналсса дяъвилул ишир­ттаву жанну дуллуми дакIнийн бичлачисса мажлис.

КIюрххил Дагъусттаннал миллатрал политикалул министр Энрик Муслимов бакIчисса делегациялул тIутIив дирхьунни МВД-лул хьхьичI къуллугърал бурж биттур бу­ллай жанну дуллуминнан дацIан дурсса гьайкалдануцI.

---

Андриана Аьбдуллаева
Хъирив Дусшиврул къатлуву хьунни 1999 шиналсса дяъвилул иширттаву жанну дуллу­сса ихтиярду дуруччай органнал зузалтрал ва ополчентурал ща­хъаннищалсса ва ниттихъащалсса хьунабакьаву.
Шикку гьуртту хьунни ДР-лул ХIукуматрал председательнал цалчинма хъиривчу Анатолий Карибов, ДР-лул Халкьуннал Мажлисрал председательнал хъиривчу Камил Давдиев, Миллатрал политикалул ва диндалул иширттал министр Энрик Муслимов, Дагъусттаннал Хъаннил союзрал председатель Интизар Мамутаева, «Кавказ» ассоциациялул президент Хасайбат Валиева ва м.ц.

Мажлис тIитIлай, Энрик Муслимовлул дакIнийн бивчунни Дагъусттаннай кьини дурксса дяъвилул гьантри, тай иширттаву Дагъусттаннал халкьуннал, ихтиярду дуруччай органнал зузалтрал ккаккан дурсса къучагъшиву.
— 1999 шинал пашмансса ххару чивчунни Аьрасатнал, Да­гъусттаннал тарихраву. Кьура шин ларгунни тания шихуннай. Да­гъусттаннал халкьуннал, гьар мудан кунна, лайкьну лархъу­ссар тай захIматсса кьинирду, цал ттигу ккаккан бувссар цала яхI, ватан ххирашиву ва кувннал кув бугьаву. Душманнайн данди бавцIуну, жанну дуллу­ссар чIявусса органнал зузалтрал. Вайннал къучагъшиву жунна тачIав хъамакъаритантIиссар, — увкунни А. Карибовлул.
Хъинну бюххансса ихтилат бунни Интизар Мамутаевал. Цинявппагу ихтилатчитурал дакIнихтунусса барчаллагь увкунни укун ххаллилсса арсру тарбия бувсса ниттихъахь, ссавурданий ва яхIирай дурк­сса кьини лахълахъисса ща­хъаннихь.

ЦIуссалакрал райондалия­сса делегациялул чулуха ихтилат бунни Аьрасатнал Виричу Мутай Исяевлул кулпат Аьбидатлул, милицанал сержант Руслан ХIаммадаевлул кулпат Суджанал.
— Ттун хъунмасса барчаллагь учин ччива тачIавгу цала зузалтрал кулпатру хъамакъабитайсса, жухсса аякьа чан хьун къаацIайсса, иш багьни, мудан чIарав усса Муслим Даххаевлухь, барчаллагь учин ччива райондалул бакIчи МахIаммадхIажи Айдиевлухь. Ва дяъвилия гъалгъа тIий личIаннав жува, къанясив баннав царагу ниттин, кулпатран жул кьадар, — увкунни Аьбидатлул.
Ихтилатру къуртал хьуну махъ цинявннайн оьвкуна ссуп­ралухун. Дуллуна медаллу ва бахшишру.