Аьдатрайн бувну, гьар шинах сентябрь зуруй, Дагъусттаннал халкьуннал шаэр Расул ХIамзатов увсса гьантрай, республикалий дувай «КIяла кьурукьирттал гьантри» тIисса цIанилусса дунияллул халкьуннал литературалул фестиваль.
П. Рамазанова
Гьашинумур фестиваль дайдирхьунни сентябрьданул 6-нний. Ва кьини республикалийн бувкIунни Аьрасатнал цIанихсса чичулт, чIявусса хъамал. Хъирив кьини Поэзиялул театрдануву хьунни литературалул таржумарттал масъаларттан хас дурсса Аьрасатнал Чичултрал союзрал секретариат.
Ва дачин дурнугу бия Аьрасатнал Чичултрал союзрал правлениялул цалчинма секретарь Геннадий Иванов ва Дагъусттаннал Чичултрал союзрал хъунама МахIаммад АхIмадов. Ванал бувсунни Дагъусттаннал чичултран ххуйсса таржумачитал аьркинну бушиву, Расул ХIамзатовлул, Сулайман Стальскийл, АхIмадхан Абу-Бакардул ва цаймигу чичултрал произведенияртту таржумарттайхчIин машгьур хьушиву. Геннадий Ивановлул бувсунни национал республикарттал автортурал луттирду итабакьлакьисса «Современник» басмаханалул даврияту, кIицI лавгунни гьар шинах РСФСР-данул халкьуннал литературалул редакциялул чанма-чанну 60 лу итабакьайсса бивкIшиву, утти лапва чанну итабакьлай бушиву. Ихтилатру бунни Чувашнал халкьуннал шаэр Валерий Тургайл, Беларусьнал шаэр Анатолий Аврутиннул, Сириянавасса чичу Ибрагьим Истанбулил ва цайминнал.
Халкьуннал шаэр увсса кьини, сентябрьданул 8-нний, мероприятиярду дайдирхьунни Тарки-Тауливсса Расул ХIамзатовлул гьаттай тIутIив дишаврийну. Шаэрнал гьаттайн бувкIцириннавух бия ДР-лул ХIукуматрал хъунама Артем Здунов, ванал хъиривчу Анатолий Карибов, ХIукуматрал ва БакIчинал администрациялул хъунама Владимир Иванов, ДР-лул культуралул министр Зарема Буттаева, Дагъусттаннал Чичултрал союзрал хъунама МахIаммад АхIмадов, Халкьуннал Мажлисрал депутатътал, чичулт, шаэрнал творчество ххирами. Вара кьини делегациялул тIутIив дирхьуна шаэрнал цIанийсса проспектрайсса гьайкалданучIагу.
Поэзиялул театрдануву бувна Аьрасатнал поэзиялул мажлис. Яруссаннал театрданул хьхьичIсса майданнив дурна «Журавли над Россией» тIисса цIанилусса патриот зумунусса балайрдал фестиваль. ЛичIи-личIисса районнаясса коллективрду гьуртту хьуна ва фестивальданий. Дагъусттаннал мазурдий экьинай бия балайрду. Бия Ккуллал райондалиятусса коллективгу. Родопский бульварданий тIурчарив, МахIачкъалаллал чIава художниктурал ва студентътурал суратру дия ккаккиялун дирхьуну. Бия тиккура мольбертирттай суратру дихьлахьиссагу, вара кIяла кьурукьирттал тема аьч дуллалисса.
