Дусшиврул бияла

Ларгсса нюжмардий «Дагестан» информагентствалий хьунни «Имам Шамил» фондрал вакилтурал пресс-конференция.

Журналистътуращал хьунабакьин бувкIун бия кIицI ларгсса фондрал президент, Дагъусттаннал Жяматийсса Палаталул член, МахIачкъалаллал Калугалийсса вакил АьлиасхIаб Хархачаев ва фондрал вице-президент Тавлу Казакбиев.


П. Рамазанова
Вайннал бувсунни Калуга шагьрулул 648 шин хьусса байрандалий Дагъусттанная­сса делегациягу гьуртту хьушиву, 1997 шиная шинмай Калуга ва МахIачкъала дусшиврул кьутIи цIакь дур­сса шагьрурду бухьувкун. Бувсунни Дагъусттаннал делегация хIурматрай кьамул бувшиву ва имам Шамил Калугалийн ивзун 160 шин шаврил юбилей даврил ма­съалагу гьаз бувшиву ва, гьамин, Калугалий бушиву машгьур­сса имамнал ца бакъа бакъасса музей-къаттагу.

Фондрал даврия ва цIусса хъунама ивтния шиннайсса дахханашивурттая буслай, Тавлу Казакбиевлул кIицI лавгунни имам Шамил щалвагу Да­гъусттаннан аьмсса виричу ушиву. 1999 шинал Къизилюртуллал райондалул ополчентурал штабрай каялувшиву дуллай ивкIсса АьлиасхIаб Хархачаев­лулгу да­гъусттан халкьуннал гьанумур мурадгу, гужгу цашивур, Шамиллулгу вава ххуллий хIарачат був­ссар, дусшивручIан, нахIушивручIан цичIар къадияйссар увкунни.