[dropcap]В[/dropcap]ай гьантрай дунияллул циркирал чаннацIукун ккаллийсса, Дагъусттаннал лайкь хьусса артисткал цIанин ччянива лайкь хьусса,Москавлий Аьрасатнал паччахIлугърал циркрал компаниялий зузисса ХIажикьурбанова – Медникова ПатIиман дуллунни «Аьрасатнал лайкь хьусса артист» тIисса цIа. Ва циркрал дунияллий Фатима тIий машгьурну бур, гъалатI къахьун.

---

ПатIимат Рамазанова
[dropcap]В[/dropcap]анил оьрмулул биографиягу аьратталсса сюжет дусса кинораву кунмасса бур. ПатIима Дагъусттаннал халкьуннал артист, Аьрасатнал лайкь хьу­сса артист, 1-мур ЦIувкIратусса Ярагъи ХIажикьурбановлул душри. Цу­ппагу 12 шинал оьрмулуву цирк­рал артисткану зий байбивхьуну бур, багьайкун захIматрал книжкагу бувну. Ванил нину Ттуплислив бувну бур, цуппагу польшанал ва оьруснал миллатирттал оь хIала бувхсса инсан бивкIун бур. Бакуй гастроллай­сса Ярагъинан (ва таний Киеврал циркраву зий ивкIун ур) цирк­райн бувкIсса ПатIимал ниттий ябавцIуну, цанма щарну бувцуну бур. Ярагъи ХIажикьурбановлул арулвагу душ, Аьрасатнаву бакъагу, щаллагу дунияллий машгьурсса пагьламан душрур. ПатIимал оьр­мулул ххуллу, мунил цила бусаврийн бувну, дахьва хьхьуттай къавтIутIисса, тяхъа-шадсса хьуну бакъар.
[pullquote]ДакIнихтуну барчаллагьрай бура нава барча буван оьвкунутIий «Илчилул» коллективрайнгу, зул каши бюх­ттул хьуннав, ххуймуния чичлансса бакъа къабу­кканнав», — увкунни ПатIимал.[/pullquote]
Нину-ппу личIи шайхту, нинушивугу, ппушивугу бу­ттал дурну дур. ПатIиман ва акробат Александр Медниковлун цаннан цаннах эшкьи хьуну дур. ПатIимащал зуншиврул Медниковлул, акробатика кьариртун, хьхьуттай гьунарду буллан лав­хьхьуну бур, ваная дунияллий ца яла хьхьичIунма пагьламан хьуну ур. Ссурвал ХIажикьурбановахъащал зий ивкIун ур ва Никулиннул цирк­раву. Вайннал трюкру уникальныйссаннун ккаллийну дур цирк­рал тарихраву, вайннайн чIявусса билаятирттайн гастроллай оьвтIий бивкIун бур, кинордавунгу оьвтIий бивкIун бур. ПатIима гьуртту хьуну бур машгьурсса балайчитурал, Алла Пугачевал ва Валерий Леонтьевлул клипирттаву. ХIакьинусса кьинигу «Соло для слона с оркестром» тIисса машгьурсса кинораву яла яргмур лахIзалун ккалли бувай ссурвал ХIажикьурбановахъул ва вайннал ласру, бажатал АхIмад Абакаров ва Александр Медников, хьхьуттай гьунарду кка­ккан буллалисса лахIза. Ва совет циркирал ца яла язимур номергур.
ПатIимал ва Александр­дул гьунардая хIайрансса американал импресариол вайннайн Американавун зун оьвкуну бур. Лас-Вегасрай мина дирхьуну дур вайннал.

Амма хар-хавар бакъа­сса бала- апатIрал ласука бувхIуну личIан бувну бур: Александр агьну, цIунцIия хьуну дур, 13 шинай шанийн агьну ур. ПатIимал циркравусса даву кьариртун дур, ласнал чIарав бикIаншиврул. Ва ччарча ттучанчину, ччарчагу цайми, учиннуча, захIматсса тту­ккул давурттай зий бивкIун бур. ХIакьинусса кьинигу ванил даврил уртакьтал хIайранну бур ПатIимал ласнайнсса дакI тIайлашиврий, танаха бувсса хIурматрай. «Циркравусса даву кьаритан багьуна, кIира шин жущалгу дурну, арсгу Чикаголийн дуклан лавгуна. Сашал дарурттахлу чIярусса арцу дулун багьлай бия, ттунгу чил квартирарду, офисру лакьлан багьуна, хIатта хIажатхантту шюшлангума. Жу ххассал хьунав Клинтоннул бала-апатI хьусса иширттаву страховка дулайсса хIукмулий къулбас дувайхту. Мяйжан­ссар, американал хIакинтал бия ттухь Саша аппарат­рая уцан уван маслихIат буллай. ТайнначIа гъан-маччанахь ихтияр дуссар мукунсса хIукму буван. Нарив, «зува Зал-идавстал ххай бурув, зунма цуксса оьрму буллуну буссарив зун къакIулссархха» тIий, аьтIун бикIайссияв. Бия, хьхьувай­сса клубирттаву къавтIий, бигьану арцу лякъин маслихIат буллали­ссагу, мукун тIутIиминнахьгу «на Заннайн вихсса инсанна» учай­ссия.

ЧIявуссаннан къабувчIлай бия, карьера гьаз хьуну нани­сса ппурттуву, циркгу кьабивтун, ттуя Сашах буруглагисса сиделка шаву. Ттуннив та акъасса циркгу, дуниялгу ччай дакъая. Сашал шанийн агьну 13 шин ва барзгу, 3 гьанттагу бувна, амма ва дунияллия лагайхту на, дуниял леркьссаксса хьуну, оьккину дакI гъаргъун буссияв, гьарзатрава дакI дурккун, — дакIнийн бутлай бур ПатIима. – Ча кIулхьунссия Саша лагаву цIусса тарихрал дайдихьу хьунтIишиву». Американаву Дю Солей циркраву зузисса Константин Агунович тIисса артистнаща бювхъуну бур цаярва 30 шинал хъунмасса ПатIима цанма щар хьун аьркиншиврий мукIру буван. ПатIима та цIанихсса цирк­раву костюмир­тталсса буллай зий бивкIун бур, Константиннунгу тикку ябавцIуну бур ваний, амма ва лахъину къарязий хъанай бивкIун бур, циркирал цIуку Константиннул цаламур бацIан бувну бур. АцIния ряхра шинава ПатIима зана хьуну бур цирк­равун. Константин рязийну, вай Аьрасатнавунмай зана хьуну бур. ПатIимал дакIничIан ххуллу ласун бювхъусса Константин Александрдул дувайсса трюкру дуллан ивкIун ур.

Александрдул аьпалун вайннал коллективрал цIа ядурну дур – «Пагьламантал Медниковхъул». ПатIима буслай бур чурххал къалипругума Александрдул ва Константиннул цалавхьхьусса бушиву, кIизгу чIяйсса, Костя Медниковлул кос­тюмгу ларххун, хьхьуттайн гьаз шайхту, Медников уттава увксса кунма бивзун, цуппа хIал бивну багьавай ливчIшиву. Шиккува бусан, ПатIимал арс Филиппгу Дю Солей циркраву зий ур, ванал кулпатгу гьаваллал гимнастка бур. «Ттун, гьай-гьай, арснал душгу хьхьу­ттайн гьаз хьуну ччива, пагьламантурал динас­тиялул дазу-зума хьуну къаччива», — тIий бур ПатIима.
Фейсбукрай ва барча буллай, чIявуми уртакьтал, дунияллул циркирал тарихраву цIарду личIансса инсантал, ца зумату кунма бур, ПатIима танийва лайкьссия Аьрасатнал лайкь хьусса артисткал цIанин тIий. «Ттун ина танийва яла язимур ва хьхьичIунмур артисткара, мяйжаннугусса халкьуннал артисткара.

Дазу-зума дакъа хIайранну бура вил гьунар бю­хъаврий, дакI хъиншиврий ва бакI-чурххал ххуйшиврий», — тIий чичлай бур Наталия Стихановская. 13 шинал лажиндарай шанийх ивхьу­сса ласнаха­сса ПатIимал хIурмат, аякьа асар хьуну, ванил чулухунмай хIурмат багьми буслай байкъалитIавай бур социал сетирдайгу, кказит- журналлайгу ПатIимал дакIнил чаннашиврия, захIматсса ишираву ччиссаннайн хиянат къашаврия. Исвагьину оьрму бутлай аьдат­сса аьнтIикIа (Аьрасатнал лайкь хьусса артистнал душ, цIа ларгсса артистка­хъал ссу) ччимур даврия махъаллил къашаврия. АцIра шин шавай дур ванил Константиннул хъаралу, ласнал аьпа­лул хIурматран коллективрал цIагу «Медниковхъулла» риртун. Фамилиягу да­ххана къадурну дур ПатIимал.

«На пахрулий бура ттула ппу, халкьуннал артист Ярагъи ХIажикьурбанов цIувкIрачу ушиврия. Буттащал цимилагу бивссара ЦIувкIравгу. ДакIнихтуну барчаллагьрай бура нава барча буван оьвкунутIий «Илчилул» коллективрайнгу, зул каши бюхттул хьуннав, ххуймуния чичлансса бакъа къабу­кканнав», — увкунни ПатIимал. Жугу дакIнихтуну чIа тIий буру цIувкIуллал цIанихсса пагьламантурал наслулиясса ПатIима ХIажикьурбанова-Медникован цIакьсса цIуллушиву. Ва хIа­кь­инусса кьинигу Аьрасатнал шагьрурдайх буклай бур дуклаки оьрчIан хьхьуттайсса магьирлугърал мастер-классру ккаккан буллай.