Вихшала дирхьуну бур

[dropcap]С[/dropcap]ентябрь зурул 3-нний Дагъусттаннал региондалийсса «Единая Россия» партиялул председатель Дмитрий Медведевлул приемныйлуву

агьали кьамул бунни Аьрасатнал ПаччахIлугърал Думалул депутат Аьвдулмажид МахIрамовлул.


Имара Саидова
ДепутатначIан личIи-личIисса масъаларттал хIакъираву увкIун ия 14 инсан.
МахIачкъалалий ялапар хъа­нахъисса Зугьра Шайхаева бувкIун бия даву лякъин кумаг баву тавакъю буллай. Ванил бувсунни цила Наби ЦIаххаевлул цIанийсса Республикалул травматологиялул центрданий интернатура къуртал бувшиву ва миккува зун ччай бушиву. МахIрамовлул цала кумагчинайн тапшур бунни Центрданул каялувчинайн Шайхаевал кандидатура ххал дигьаву мурадрайсса ходатайство чичин.

ЦIуллу-сагъшиврул 1-мур группалул мушакъатшиву дусса МахIаммад ГъазимахIаммадов увкIун ия протезру цIу баврил масъалалул ялув. Ванан хIакинтурал чивчусса медициналул ва социал экспертиза був­сса чагъарданий ккаккан бувну бур реабилитациялул кьай-кьуйлул дузал увну икIан аьркиншиву. ГъазимахIаммадовлул бусаврийн бувну, ва инжит увну ур, шинал лажиндарай цанна ккаккан дурмур ласун къабюхълай. МахIрамовлул ва масъалалул хъирив лаяву мурадрайсса тIалавшинна гьан дунни жула региондалийсса Социал страхованиялул фондрал отделениялул каялувчинайн.

Хивуллал райондалийсса Лака тIисса шяравасса Зиянат Аьбдулагъаева аьрзирай бувкIун бия, Автодорожный колледжрал 2-мур курсирай дуклакисса арс общежитиялуцIа увну. Ванил бувсунни, шяраваллил кIанттай ялапар хъанай, цилалу кIива оьрчI чивун буккан буллан захIматну бушиву ва шагьрулий дуккаву дуллалисса оьрчIан лаякъатта бугьансса каши-кьудрат дакъашиву. Ва масъалалул хIакъиравугу депутатнал колледжрал директорнал цIанийнсса, кумаг баву тIалав буллалисса чагъар чивчунни.
Цинявппагу цачIанма бувкI­сса агьалинал масъалар­ттал хIакъираву ккавккунни мас­лихIатру ва цала кумагчитурайн тапшур бунни ми дузал баврил ялув бацIан.