Сентябрьданул 3-нний ДР-лул БакIчи Владимир Васильевлул ва Аьрасатнал ФАС-рал (Антимонопол комитет) каялувчи Игорь Артемьевлул дунни «АьФ-лул субъектирдай конкуренция лядуккан даврин хасъсса давурттал план» цIакь даврил масъала ххал бигьлагьисса батIаву

Владимир Васильевлул Игорь Артемьевлун дуллунни ДР-лул ХIурматрал грамота.
«Зий айивхьусса гьантрайва на чайссия федерал министерстварттал ва идарарттал жунма кумаг буллантIиссар низам дишаврил давурттаву куну. Цалчинминнавух жучIанма бувкIуна Аьрасатнал ФАС-рал зузалт, миннал тамансса давуртту дуруна цIуллушиву дуруччаврил, ххуллул хозяйствалул ва цаймигу лагрурдай. Микку ашкара бувна картеллал машварартту (сговоры) бувну бивкIшиву», — увкунни республикалул каялувчинал.

Игорь Артемьевлул бувсунни ххал бигьлагьисса ма­съала бавхIуну бушиву АьФ-лул Президентнал ХIукму бартбигьаврицIун. Ванияр кIира шинал хьхьичI цIакь дурну диркIссар конкуренция ляду­ккан даврин хасъсса национал план.
ФАС-рал каялувчинал тIи­мунийну, Аьрасатнал ХIу­куматрал цIакь дурну дур 18 аралул (отраслевая) программа, энергетикалия тIайла хьуну, дуккаврийн ва культуралийн диянцIа, миккугу ккаккан дурну дур балжину дуван аьркин­сса давуртту. Жулва хьхьичIсса агьамми масъаларттуну хъанахъиссар конкуренция ляду­ккан даврил план ва национал проектру цаннацIун ца дазаву, мукун къабарча, му укунна арцу харж давур монопол идарарттал, минналгу багьри лахъ бантIиссар, захIматрал лябукку ялавай багьантIиссар ва давугу хъинну барткъадигьинтIиссар.

Махъсса ппурттуву республикалий иш-тагьар хъин чулийннай даххана хьуну дур, му тасттикь буллай бур ккаккияр­тталгу. Масалдаран, властьрал органнал антимонопол законну лиян даву чан хьуну дур 70 процентрал. Законну лиян давуртту тамансса дия хьхьичIра, лиян дуллай бия тендердал процедурартту, бия картеллал машварартту (сговоры), криминалитет, коррупция. Дагъусттаннал БакIчиналгу, зулгу, жул къуллугъралгу хIарачатирттайну му цифралийн бувкIунну. Му хъинну ххуйсса хIасилли.
Яла махъ лавхъунни ДР-лул экономикалул ва территорияр­ттал лябуккулул министр ХIажи Султановлул. Мунал бувсунни конкуренциялул лябуккулул цIусса стандарт цIакь байни дан аьркинсса давуртту даххана хьушиву, ххуллул карталул проект­равун ларсун душиву ялун ххи дурсса давуртту.
ХIажи Султановлул тIи­му­нийну, чIяруми хьхьи­чIун­найшивуртту дархIуну дур экономика чаннайн дуккан даврицIун ва бизнес ххютула дуккан даврицIун.
БатIаврий махъ лавхъунни ДР-лул УФАС-рал каялувчинал буржру чIумуйсса бартбигьлагьима Кьагьир Бабаевлул. Мунал гьаз бунни транспортрал аралувусса захIматшивурттал, кьатIувсса рекламарттал, аьрщарал участокирттал, ЖКХ-лул ва цаймигу арардал масъалартту.
ДР-лул ХIукуматрал Председатель Артем Здуновлул бавтIминнал хьхьичIун лавсунни ххал бигьлагьисса масъала бартбигьлагьавриву гьуртту хъанахъиминнан даву лахьхьин дуллан аьркиншиврул масъала. Мунал тIимунийну, Къазаннай бусса бур ФАС-рал дуккаврил центр, тихун гьан бан бучIия конкуренциялул масъаларттаха зузими даву лахьхьин.
БатIаврий гьаз бувсса масъа­лартту, предложенияртту ва хIукмурду чивчунни протоколданий.