АцIа саллатI Дагъусттаннайн «самоволкалий» гьан ччай ивкIун ур

Сентябрьданул 19-нний Да­г­ъусттаннаясса 10 саллатI Уфа шагьрулийсса №43154 аьра­ллил частьрал кьюкьлува ливхъун бур.

Интерфаксрал баян баврийн бувну, ми лавгун бур ярагъгу бакъанма, цукунчIавсса хавар-чагъаргу къачивчуну. Амма гьан хьхьичIсса хьхьуну миннал цала гьалмахтурахь бувсун бур, экстремистурая цалла минарду дуруччин Дагъусттаннайн гьансса пикрилий ушиву. Ца хьхьу-кьини паркрал зоналийгу дурну, цахьра харжлугъ диял къахьунтIишиву бувчIусса саллатI махъунмай частьравун кIура бавну бур. «Самоходчиктурал» ниятру уздансса диркIшивугу хIисавравун лавсун, гай уголов жаваблувшиврийн кIункIу къабантIий бур, так административ зумунусса танмихIрай гьашиву дурну.

ЧIаххуврансса чIарахбацIулун

ХIакьинусса кьинигу Щардал жяматран дакIния дуклай дакъар цалва чIаххуврайсса ТIюхчардал жямат цала бу­ттал миналия мичиххичнал аьрщарайн бизан буллалисса чIун. ТIюхчардал жямат оьккину ялапар хъанай къабикIайва. Лухччалгу авадансса, цалва маэшат цала буллалисса, хIатта цайми шяраваллал жяматирттаяр ххуйну ялапар хъанахъисса жямат бия. Амма, кьариртун бу­ттал шяравалугу, бизан багьуна Цуссалаккуйн. Утти, цIусса миналийгу, къачагътал ялун ххяв­ххун, цалла шяравалугу, къатта-къушгу, хъус-кьинигу кьариртун, лихъан багьну бур. Щардал жяматрал хьхьичIва Лаккуй­сса цалва чIаххул ТIюхчардан ва махъсса лакрал халкьуннан кумагран тIайла дурккунни яларай кIицI ларгсса затру: иникьали – 28 дарваг, качар-песок – 6 дарваг, ппиринж – 3 дарваг, нувщи – 30 дарваг, калан – 4 дарваг, вермишель – 2 дарваг, янна-усру дусса 30 дарваг. Щардал жяматрал гьан дурсса дукия, лаххия хIалал хьуннав цинявппагу лакрал лихъачалтран. Ччясса му­тталий бухлаган баннав паракьатсса инсантуран ялун ххявх­сса къачагътал.

№39 «Илчи» 1999 ш.