Сайпуллагьлул душ Оьмарова Асват
Уттигъанну оьрмулул 94 шинаву, аьпалухьхьун лавгунни ххаллилсса лакку хъамитайпа, Хъун дяъвилул ветеран, Гъумучатусса Сайпуллагьлул душ Оьмарова Асват.
Бувну бур Асват Гуржиянаву, Телави шагьрулий, 1925 шинал. ЧIивину буна нитти-буттацIа хьусса Асват, циярва хъунисса уссищал ва ссищал, гъансса инсаннал бувцуну бур цачIанмайва Щурагьун, яла гиччагу лавгун бур Гъумукун (цила буттал шяравун). Гъумук къуртал бувну бур школа. Зий бивкIун бур дяъвилул шиннардий военкоматрай, хъирив – ЗАГС-рай, яла чIярусса шиннардий зий бивкIссар паспортрал столданул хъунмурну.
Пенсиялийн бувккун махъгу оьрмулул 76 шин хьуннин Асват зий бикIайссия Гъумук личIи-личIисса идарарттай. Чув зий бухьурчагу, ванил ккаккан бувссар цуппа хъинну за кIулсса, жаваблувшиву ххисса зузала бушиву. Гъумучиян цинявннан дакIнийссар «Паспортрал Ася» дакI хъинсса, урувгнал я бацIансса, лазилавкьусса, коллективраву хIал бавкьусса инсан бивкIшиву.
Асват ахиратрал шаврил хъуннасса кьурчIишиву кIидачIлай, жижара буллай буру арснахь Мурадлухь, арснал оьрчIахь, гъан-маччанахь цинявннахьвагу. РухI хъинний дишиннав, алжаннул ххари баннав. Ваксса къавхьуну цучIав дунияллия къагьаннав.
Гъумучиял жямат
АьбдуллатIиплул душ Аьлиоьмарова Бубу
Тамансса хIаллай къашавайгу бивкIун, оьрмулул 92 шинаву аьпалувух бивхьунни КIямашрал шяраватусса АьбдуллатIиплул душ Аьлиоьмарова Бубу.
[dropcap]Б[/dropcap]убу бувссар 1927 шинал КIямашав АьбдуллатIиплул ва Пирдавслул кулпатраву. Дяъвилул шиннардий ккаши-мякь ккаккаву бакъа, хъунмасса бала бивссар вайннал къушлийн – дяъвилул цIарава зана къавхьуссар Бубул жагьилсса кIия уссу, ташулулвагу къавхьуну бивкIсса.
Бубу щар хьуннин зий бикIайссия шяраваллил колхозрал фермалий. Щар хьуну махъ лас ХIабибуллагьлущал архIал бивзссар МахIачкъалалив.
Бубу бия хъинну хIал бавкьусса, даврий зузиминнащал бикIу, шяраваллил жяматращал бикIу хIаласса, дакI хъинсса хъамитайпа. Оьрмулул бугьара хьунугу, ванил симандалия къаларгуна иминсса пишлилгу, дакIнил хъиншиврулгу лишанну. Бубу зий бикIайссия ччатI шашайсса, накIлил дукия дувайсса заводирттай.
Чув зурчангу, хIурматрай бикIайва архIал зузиминнал дянив, дулайва ванин хIурматрал лишанну, бахшишру. Ва бия захIматрал ветерангу.
Бубул бивкIулул жижарагу буллай, ванияргу оьрмулул буччиннин зувагу битаннав тIий буру ванил никирай бивзминнахь: арснахь ХIажибуттахь, душнихь Галяхь, вайннал оьрчIахь, ласнахь ХIабибуллагьлухь, куявнахь Жаватханнухь, ссихь Залмухь ва махъсса щалвагу агьлу-авладрахь.
Бубул рухI алжаннул ххари даннав, гьав нурданул дуцIиннав.
КIямашрал жямат
Пашманшивугу кIидачIлай, дакIнихтуну жижара буллай буру Космина Исрапиловахь, ванил ххирасса нину
Майсарат
ахиратрал шаврийн бувну. Цил бунагьирттал аьпа баннав.
«Илчилул» редакция
