[dropcap]М[/dropcap]ахIачкъалалив, М. ХIажиевлул цIанийсса кучалий бивхьу­сса, зумух ласун тIааьнсса «Бархъал» тIисса цIа дусса кафе ччянива ххира хьуну бур шагьрулул агьалинан, 

хаснува лакран, лакравугу хъиннува ххира хьуну бур карашран ва бархъаллан. «Бархъал» тIисса цIаницIун тIааьнну даркьусса дур Банавша тIисса кафелул залуннал цIагу.

---

[dropcap]Ч[/dropcap]Iявучин бавссар нахIура-нахIусса Банавшал дукрардая, хаснува ккунукрал ххунчIая, хIатта дуцIайсса рассук-хъатраягума. Ца ттун кIулсса жагьил буслан икIай, дустуращал цала иширттай шагьрулувух занай бивкIун, бугу-бувххун, ккашилгу хьусса цивппа, ссавурданува буклай, цаннайн ца чIу лахъ буллай лявкъунав тIий. Му чIумал миннавасса цаннал куну бур:

«Балхарданувун», БанавшачIан, гьан чIун хьуну дунуккар жунна», — куну. Мунияр махъ мудангу, архIал кьатIув бувксса чIумал, «Балхарданувун» — БанавшачIан» учиннин ялугьлан бикIайссияв тIива.
Сайки 30 шин шавай дур Банавшал ва кафе зузи бувну. Нажагьссавагу бакъахьунссар кафелувусса дукралия, шиккун увкIнахасса къулагъасрая рязи акъа ливчIсса. Цуппа Банавшагу бур аьчух­сса, нахIу-хIалимсса, най бунува дакIнил ласайсса журалул инсан. Ва цуппагу бувну бур Интнил байрандалул кьини. Банавша тIисса, тIутIул цIагу дусса душ цамур куццуйсса бикIангу къабучIия. Бувсса кьинилуцIун бавхIуну, жунгу ччан бивкIунни жула кказитрайгу Банавшая бусан.

Бувну бур Банавша март зурул 22-нний Карашрал шяраву, чIявусса оьрчIру бусса ДамахIажинал ва Миясатлул кулпатраву. Ва шяраву бавкьусса, нахIу-хIалимсса кулпат бивкIун бур.
— Жул ппу хъинну хIарачат бусса, дахху-ласулулгу ишру нани бан кIулсса инсан ия. Ттун къадакIнийри жула ичIува лахъсса чIуний гъалгъа тIий, ппу ва нину цаннайн ца дяъвай бивкIсса чIун. ТачIав къабавссар буттал зумату ссуг, ккиш-кьянцI, ниттийн гьужум буллалисса ихтилат, — тIий бур Банавша.

Авария хьуну, дянивсса оьр­мулий ивкIуну ур Банавшал ппу. Мяйва оьрчIгу ниттил аякьалий ливчIун бур.
— Нинугу зий диркIхьурчагу, къатлул дуланмагъ дуллалима ппу ия. Га ивкIусса кьини, къума лавгсса инсантурахгу буруглай, цукунни къаша-шавайсса ниттил жува, мяйва оьрчI, бакI буккан бантIисса тIий, буруккинттарай буссияв, — дакIнийн бутлай бур Банавша.

Амма уттаваминнансса кьисмат чан къашайхха, цаннаха цаннал аякьа дуллай, ччаннай бавцIуну бур цинявппа оьрчIру.
— Ттуламур кулпатгу ххуй­сса хьуна. Къатлувун урувгсса, хIарачат бусса, ттухара аякьа ду­сса лас бакIрайн агьуна. ДакIний бакъар, дянив бувчIу-къабувчIу хьуну, нава адаминайн ххавххун, буттахъаннийн лавгун бивкIсса мутта. Амма, цачIу лахъисса оьр­му бутансса кьисмат къавхьуна. Ташулул хьуну 15 шинава, къашай хьуну,аьпалухьхьун лавгуна ттул лас. Гьашину 24 шин хъанахъи­ссар му ахиратрал хьуну, — буслай бур Банавша.

Щар хьуну махъ Банавша цила лас Шагьруттиннущал бувххун бур дуклан МахIачкъалаллал политехникумравун дуки-хIачиялул технологтал шайсса отделениялийн. Ва тани хъинну сий ду­сса пиша бивкIун бур. Укунсса пишакарталгу тIалавну бивкIун бур. Цила пишалий Банавша зий бивкIун бур личIи-личIисса кIанттурдай. ХIасил, оьрмулул 19 шиная шихунмай Банавша общепитрай зий бур. 1990-ку шинал Банавшагу, ласгу «Балхар» кафелуву зун бивкIун бур: лас – директорну, Банавша – производствалул хъунмурну. Тани укунсса общепитрал столовойрду, каферду коллективнайну булай­сса бивкIун бур.
1992 шинал тIурча, Шагьру­ттиннущал ва Банавшал машан лавсун бур кафе. Амма ца-кIира шинава, къашай хьуну, лас дунияллия лавгун ур. Банавшангу, таналмургу, циламургу хъар лархъун зун багьну бур. Цимилагу асар хьуну бур Банавшан лас чIарав акъашиву. Амма хъардив лархъун дур. Банавшал бур кIива оьрчI: душ, Светлана, цила кулпатращал Аьшттарханнай ялапар хъанай бур. Арс Марат МахIачкъалалив зий ур федерал казначействалул управлениялий.
Банавша цуппагу «Илчи» кказитрал муданмасса буккур. Гьарца шинал ванил чичайссар кказит цинмагу, цайминнангу.

«Илчи» кказитрал редакциялул чулухатугу, «Лакку билаятрал рухI» тIисса группалул чулухатугу, бувсса кьинигу, Интдайдихьулул байрангу барча дуллай, чIа тIий буру Банавшан цIуллу-цIакьшиву. Ина дуллалисса гьарцагу даву дюхъаннав!