Къирим Аьрасатнащал цачIун хьуну 5 шин шаврил таварихрацIун дархIуну, Аьрасатнал регионнай хьунни фестиваль – «Къиримнал инт».
МахIачкъалалив ва республикалул цаймигу шагьрурдай ва районнай фестивальданул лагрулий хьунни личIи-личIисса шадлугъру, концертру, суратирттал выставкартту.
Бадрижамал Аьлиева
[dropcap]М[/dropcap]ахIачкъалалив Дусшиврул къатлуву хьунни элмийсса ва практикалул конференция. Муний гьуртту хьунни ДГУ-лул проректор Мадина МахIаммадова, ДР-лул Миллатирттал политикалул ва диннал иширттал министерствалул ва цаймигу идарарттал вакилтал, республикалул вузирдал тарихрал факультетирттал студентътал. БавтIминнал хьхьичI ихтилат бунни ДР-лул миллатирттал политикалул ва диннал иширттал министрнал хъиривчу Арсен МахIмудовлул.
— Ванияр 5 шинал хьхьичI, мартрал 16-нний, хьуссар агьамсса иш – Къирим зана хьуссар Аьрасатнал Федерациялувун. Муния шиннайсса чIумул мутталий дуван бювхъуссар чIярусса давуртту. Къиримнал инсантурал оьрму сайки щаллуну баххана буван бювхъуссар, — увкуна ванал.
Ми ххюрагу шинал манзилданийсса иширттан хас бувсса доклад бувна тарихрал элмурдал кандидат Жамиля Апанниевал. Ихтилатру мукунма бувна тарихчи Тимур Айтберовлул, Р. ХIамзатовлул цIанийсса фондрал вице-президент ХIабибат Аьзизовал. Ахирданий бавтIминнал экскурсия бувна Аьрасатнал Халкьуннал Дусшиврул музейравух.
Яруссаннал театрданул хьхьичI хьунни шадлугърайсса батIаву. Муний гьуртту хьунни ДР-лул ХIукуматрал председательнал цалчинма хъиривчу Анатолий Карибовгу. Микку хьусса концертрай цалва пагьму-гьунар ккаккан бунни «Дагъусттан» ансамбльданул къавтIалтрал ва республикалул цIанихсса балайчитурал.
Поэзиялул театрданул ва Дагъусттаннал опералул ва балетрал театрданулгу гьурттушинна дунни фестивальданий. Ккаккан дуруна Аркадий Мамонтовлул «Къирим. ЦIусса эра» тIисса фильм. Балайрду увкуна Дагъусттаннал халкьуннал артист МухIсин Камаловлул, ЯхIия Исякьовлул, Олеся Петровал. Назмурду дурккуна Марат Шагьмановлул ва Индира Зубаировал.
«Аьрасат – ттул тарих» тIисса Тарихийсса паркравугу хьунадаркьунни Къиримнал инт. Щалла кьинилул лахъишиврий шикку «ХХ век» тIимур залдануву буллай бия хъамаллурансса экскурсияртту. ТIивтIуну бия Къиримнал тарихран хас бувсса цIусса экспозиция.
«Къиримнал интнил» лагрулий МахIачкъалалив хьунни спортралми шадлугъругу. Елена Исинбаевал цIанийсса стадиондалий хьунни 2003-ку шинал бувсса жагьилтурал дянивсса волейболданул Дагъусттаннал первенствалул финал. Бяст-ччалливух гьуртту хьунни республикалул районнаясса ва шагьрурдаясса 12 команда. Шикку ххув хьуми гьуртту хьунтIиссар апрель зуруй Кисловодскалий хьунтIисса Кьиблалул Федерал округрал ва Ухссавнил Ккавкказуллал Федерал округрал чемпионатрай.
МахIачкъалаллал Автомобиллал ххуллурдал колледжраву, аьралуннаву къуллугъ буван гьан бувасса жагьилтурал дянив, хьунни карунний бияврил первенство. Муний гьуртту хьунни республикалул 25 аьрали ва спортрал клубравасса 200-нния ливчусса спортсментал. Миннаву яла чIяруми бахшишру дурххунни МахIачкъалаллал ва Каспийскаллал аьрали ва спортрал клубирттавасса жагьилтурал. Ми гьуртту хьунтIиссар Набережные Челны шагьрулий мартрал 22-нния 25-ннийн бияннин хьунтIисса Аьрасатналмур первенствалийгу.
