ЧIяйннал школалийнсса аьрххи

Школалул библиотекалий

[dropcap]К[/dropcap]Iулшиву ласаврил аралуву цилва бюхъу ва хIарачат хьхьичIунсса бушиву мудангу чIалачIи буллалисса инсан ХIажинал душ ХIаммакуева Альбина

 дукIусса сентябрь зуруя шинмай зий бур Ккуллал райондалий ца яла сий думур идаралун ккаллисса ЧIяйннал школалул директорну. Ванилгу, жулгу дянив хьунни чIиви-хъунсса ихтилат.


— Альбинай, дурусну ряхва барз хъанай бур ина ЧIяйннал школалул директорну зун бивкIния шинмай. Му чIумул мутталий ци дуван бювхъур, ци къабювхъур? Цукунсса бур ялунсса мурадру?
— Буниялагу, на хIисаввагу буллай къабивкIссара нава зузи­сса барзру. ЧIяйннал школалувух хIалану хIисав байссар оьрчIал багъгу. Мунияту ванийн учай­ссар «ЧIяйннал школа-багъ» кунугу. Школа цуппагу жула цIа дурксса шаэр Бадави Рамазановлул цIанийссар. Школалий дуклай ур 62 оьрчI, оьрчIал багъраву уссар 21 чIивитIу. Коллектив сакин хьуну бур 23 педагогная. Махъсса чIумал циняв школарттай медкабинет­ру тIитIара тIисса тIалавшинна дурккунни. Мунияту жу школалун ва оьрчIал багъран цачIусса медкабинет тIитIарду оьрчIал багърал къатраву. МуницIунсса кьай-кьуй хIасул дансса кумаг бувунни Хъусращиял шяравасса, «Целитель» идаралул каялувчи, МахIаммадов Шихамирдул. ХIалу дагьну дунура, кказитрайхчIингу жу барчаллагь тIий буру мунахь.

Бакьин буван бювхъунни туалетру – цивппагу гъилисса. ТIайлар, му кьатIувсса бур. ОьрчIал дукра дукайсса кIану бакьин барду. Библиотекалун луттирду бишайсса улттив ласун бювхъунни. Ниттил мазрал кабинет бакьин буллай буру. Амма жул яла агьаммур давуну хъанахъиссар оьрчIан цил даражалийсса кIулшиву дулаву. Дуссар хIисаврттал, химиялул, информатикалул, къавтIаврил, балай учаврил, театрданул, къатта-къушлилсса бан ла­хьхьин байсса кружокру. Зуруй цал 9-мур ва 11-мур классирттал оьрчIал экзаменну дулайссар, уграт буккан, ЕГЭ дулуннин сивсуну бикIаншиврул.

Учин мукъун, жул школалий дарсру дихьлахьисса учительтал цала касму ххуйну кIулсса специалистал бур, 19 учительнава 10 учитель ур хIурматрал цIардан лайкь хьусса: Рамазанова ПатIима, Рамазанова Сиянат, Шагьабуттинова Гулжагьра, Ибрагьимова Пахай, АьвдурахIманов Сяид, Жалалова ХIабибат, Маммакьурбанов Арсений, МахIмудова СултIанат, Кьудуева Виолетта ва нава.

Яла жу Альбина ХIажиев­нащал архIал ялтту бувкссияв библиотекалул, столовойлул, оьрчIал багърал. Гьай-гьай, ттул бакIраву «гъилисса туалетру» цукунсса бурвав тIисса пикригу щуруйнма бия. Ххал барча, миннуву бивхьуну бия токрай зузисса радиаторду.
Укунсса хьуна ттул ЧIяйннал школалийнсса кутIасса экскурсия. На рязину ливчIра кIикку дуллалисса давурттая. Ка бакьиннав зуцIун Занналгу!

Ихтилат бувссар
ХIажимурад ХIусайновлул