Авгъаннал аьрщарая Совет аьрал буккан бувну 30 шин бартлаглай дур февраль зурул 15-нний. Тарихраву ца яла лахъи лавгмур дяъвилун ккаллисса, сайки 10 шинал лажиндарай най бивкIсса (1979-1989 ш.ш.) та  дяъвилий гьуртту хьуну бур 600 азарунния ливчусса аьралитал.

ОьрмулуцIа хьуну ур 15031 инсан, 264 аьраличу ятIа-тIар бакъа акъа хьуну ур. Дагъусттанная Авгъаннаву аьрали бурж лахъан лавгун ур 4000 инсан, миннава –  500-нная ливчусса  лак.

Авгъаннал билаятрайсса дяъвилий 141 дагъусттанлувнал, миннава 5 лаккучунал, къучагъшиврий жанну дуллуну дур, 109 дагъусттанлув мушакъат хьуну ур, 4 ятIа-тIар бакъа акъа хьуну ур, 769  дяъвилул цIараву ккаккан дурсса къучагъшиврухлу, лайкь хьуну ур личIи-личIисса аьрали наградарттан. КIиннал ларсун дур Совет Союзрал Виричунал цIа.

Авгъаннаву къуллугъ буллайсса 40-мур армиялул каялувчитуран ляличIинува бусравну бивкIун бур кьянкьа-кьурчIисса, вихшала дишин бучIисса  дагъусттан оьрчIру. Дагъусттаннал аьралитал бусравну бивкIун бур кIанттул агьалинангу.

ХIакьинусса кьини Дагъусттаннай ур интернационал бурж лахълай ивкIсса 2648 инсан.

На хьунабавкьура Авгъаннаву аьрали бурж лахълай бивкIсса цаппара лакку оьрчIащал

---

Залимхан Даххаев,

ш. Ккул

Къуллугъ буллай ивкIун ур 1987-1988 шиннардий 105-мур бригадалул 2-мур мотострелковый роталуву. Авгъан дяъвилий ккаккан дур­сса къучагъшиврухлу лайкь хьуну ур «Чувшиврул ордендалун», «Къучагъшиврухлу», «Бу­ттал кIанттул цIанийсса II даражалул лайкьшивурттахлу» тIисса медаллан. Авгъаннава увкIун махъ къуллугъ буллай ивкIун ур Ленинградрай. 1997-2002 шиннардий зий ивкIун ур полициялул органнай. Мунияр махъ, 2010 шинайнин, зий ивкIун ур Да­гъусттаннал ФСИН-лул управлениялий  отделданул хъунаману. Шанна шин дурну дур республикалул МЧС-рал агьаммур управлениялий министрнал кумагчину. 2013-ку шиная шихунай къуллугъ буллай ур Дагъусттаннал Виваллил ишир­ттал министерствалул ОСБ-лий (Отдел собственной безопасности). Ванал дур полициялул подполковникнал чин.  Гьуртту хьуну ур 1999 шиналсса ва Ханкалалийсса дяъвилул иширттаву.

Ризван Исяев,

ш. Бархъал

Къуллугъ буллай ивкIун ур 1986-1988-ку шиннардий разведподразделениялуву, Кабул ва Баграм шагьрурдал дянивсса Чарикарская зеленка тIисса кIанттурдай. Амирдул къалалия арх бакъасса кIанттурдайсса операциялуву, душманнал руртсса граната экьиличлай унува, каниву пIякь увкуну, захIматсса щавурду дирну ивкIун ур.

Лайкь хьуну ур ЯтIул ЦIукул ордендалун, «Талатаврил лайкьшивурттахлу» ва цаймигу медаллан. Щинавун бюкьлакьисса инсантал цимилагу ххассал бувну тIий, гьашину МЧС-рал зузалтрал пишалул байрандалул кьини ванан дуллунни «Бюкьлакьими ххассал баврихлу» тIисса медальгу.

Закария ХIажиев,

ш. 1-мур ЦIувкIул

Къуллугъ буллай ивкIун ур 1983-1985 шиннардий сапертурал роталуву Панджшер ратIувсса Руха тIисса шяраву. Лайкь хьуну ур «Къучагъшиврухлу» ва  цаймигу медаллан. Зана хьуну махъ, МахIачкъалалив автодорожный техникумгу къуртал бувну, личIи-личIисса давурттай зий ивкIун ур.

Аслан Шихалиев,

ш. Ккул

Къуллугъ буллай ивкIун ур  1983-1985 шиннардий танкардал батальондалуву Пулихум шагьрулий. Лайкь хьуну ур «Талатаврил лайкьшивурттахлу» тIисса медалданун. Аьралуннава увкIун махъ къуртал бувну бур Москавуллал химиялул машинартту баврил институт (МИХМ).

АхIмад Мутаев,

ш. Ккул

Къуллугъ буллай ивкIун ур 1983-1985 шиннардий Кабуллай мотострелковый полкраву. Лайкь хьуну ур «Къучагъшиврухлу» ва «Талатаврил лайкьшивурттахлу» медаллан.

Аьралуннава увкIун махъ къуртал бувну бур Харьковрай автодорожный институт. Зий ивкIун ур личIи-личIисса давурттай.

Исмяил Мусаев,

ш. Хъювхъи

Къуллугъ буллай ивкIун ур 1985-1987 шиннардий Кабуллай, мотострелковый полкраву.

Лайкь хьуну ур  «От  благородного афганского народа», «Аьраличу-интернационалистнан» ва цаймигу медаллан. Зий ур дяъвилул ишир­ттаву гьуртту хьуминнал масъаларттаха зузисса фондрай.

Нураттин Кьурбанов,

ш. 1-мур ЦIувкIул

Къуллугъ буллай ивкIун ур 1983-1985 шиннардий Пулихум шагьрулий танкардал аьралуннаву. Аьралуннава зана хьуну махъ къуртал бувну бур Москавуллал механико-технологический техникум. Ти­чча тIайла увккун, кIира шинай зий ивкIун ур Белоруссиянаву. Яла, Дагъусттаннайн зана хьуну, шийх личIи-личIисса давурттай зий ивкIун ур.

Лайкь хьуну ур «Талатаврил лайкьшивурттахлу» ва цаймигу медаллан.

МахIаммада Загьидинов, 

ш. 1-мур ЦIувкIул

Къуллугъ буллай ивкIун ур 1984-1986  шиннардий Руха шагьрулий, бахьттагьалтрал аьралуннаву.

Лайкь хьуну ур «Къучагъшиврухлу» ва «Талатаврил лайкьшивурттахлу» тIисса медаллан. Аьралуннава увкIун махъ Вологодрал областьрайсса  Череповец шагьрулий къуртал бувну бур строительный институт. Зий ур строительствалул давурттай.

АхIмади Гъазиев,

ш. ЦIуссаккул

Къуллугъ буллай ивкIун ур Кундуз провинциялий, мотострелковый полкраву. ИвкIун ур  взводрал командирнал хъиривчуну. Лайкь хьуну ур «Талатаврил лайкьшивурттахлу» тIисса ва цаймигу медаллан.

Чачаннал дяъвилий лайкь дурну дур «Къучагъшиврул орден»

Андриана Аьбдуллаева