Дагъусттаннал жагьилтурал тиккугу бурувччуссар яхI

[dropcap]Ф[/dropcap]евраль зурул 15-нний МахIачкъалалив хьунни совет аьрал Авгъаннава буккан бувну 30 шин шаврин хас бувсса мажлисру.

Андриана Аьбдуллаева
Аьдатравун багьсса куццуй, кIюрххил ссят 11.00 хьусса чIумал, «Авгъаннал паркравун» бавтIун бия республикалул къуллугъчитал, Авгъаннал аьрщарай аьрали бурж лахълай бивкIми, та дяъвилул иширттаву жанну дуллуминнал гъан-маччами. Билаятрал тарихраву, халкьуннал дакIурдиву хъин къашай­сса щавурду кьариртсса Авгъаннал билаятрай най бивкIсса дяъвилул ишру дакIнийн бичлачи­сса, да­гъусттан жагьилтурал та дяъвилий ккаккан дурсса къучагъшивурттая бусласисса ихтилатру бунни Авгъанисттаннал ветерантурал координацион советрал председатель, генерал-майор Оьмар Муртузялиевлул, Дагъусттаннал аьра­ли комиссар Дайтбек Мус­ттапаевлул, МахIачкъалаллал администрациялул бакIчинал хъиривчу Запир Алхасовлул, МахIачкъалаллал Жяматийсса палаталул председатель Салим Аьвдулкьадировлул, Дагъусттаннал Ветерантурал советрал председатель МахIарам Аьлиджановлул, ЗахIматрал ва социал иширттал министр Изумрут МухIуттиновал, Авгъаннал дяъвилий жан дуллусса къучагънал бутта МахIаммад ХIасратовлул, Дагъусттаннайсса Авгъан дяъвилул ветерантурал советрал председатель Нажмуттин Акаевлул, АьФ-лул ПаччахIлугърал Думалул депутат ХIаджимет Ссапараьлиевлул, МахIачкъала шагьрулул Авгъан дяъвилул ветерантурал советрал председатель Аьлисултан Аьлисултановлул ва м.ц.

[pullquote]1988-ку шинал апрель зурул 14-нний Авгъаннал, Пакисттаннал, Совет Союзрал ва США-нал чил билаятирттал иширтталсса буллалисса министртурал Женева шагьрулий Авгъаннавусса тагьарданул хIакъиравусса икьраллу чирчуссар. Вайннуйн бувну 9
зурува Совет аьрал буккан аьркинну бивкIссар Авгъаннал аьрщарая.[/pullquote]

— Совет аьралитал гьуртту хьу­ссар 16 билаятрайсса къалма­къаллаву. Чув бухьурчагу, миннал лайкьну биттур бувссар цала инсаншиврул ва аьрали бурж, яхIирай лархъссар захIматсса кьинирду. ЛяличIинува захIматсса хьу­ссар жула аьралитуран Авгъаннавусса дяъви.

Цурда талатаву да­къассагу, вайннан аьдат бакъасса, захIматсса тIабиаьтрал шартIругу духIлан багьссар, чIявусса аьралитал цIаллил ва бургъил азарданул къашавай хьуссар. Та дяъвилий жула аьралитурал кка­ккан був­ссар цала яхIгу, чувшивугу, — увкунни МахIарам Аьлиджановлул.
— На барчаллагьрай ура Хъуна­сса Заннайн нава 30 шинай зущал архIал изан, хьунаакьлан бюхълай уну тIий. Ттун зуяту хъунма­сса пахру бур. Ттувура жан ду­ссаксса на зущал уссара, — увкунни та аьрай арс ивкIусса буттал МахIаммад ХIасратовлул.
Ххюра шинай Авгъаннаву къуллугъ буллай бивкIсса ла­кку душ Соня Щекьиевал аьй-бювкьу дунни захIматрал ва социал иширттал министрнай, ва кьини Авгъаннаву къуллугъ буллай бивкIсса аьралитуран чIири-хъунсса бахшишру къадурну тIий.

— Москавлив Авгъаннаву бивкI­миннайх 15 азарда къурушгу, миннуцIун сурсатругу бавчIунни. Циванни жуламиннал чулухуннай зу ва агьамсса байрандалул кьини баччибакъашиву дурсса, — увкунни ванил.
Ихтилатру къуртал хьуну махъ Аьраличу-интернационалистнал гьайкалдануцI дирхьунни тIу­тIив.

Ахттая ссят кIира хьусса чIу­мал байбивхьунни Къумукьнал театрданувусса мажлис. Театрданул фойелуву ккаккиялун дирхьуну дия Аьрали савлугърал музейравасса экспонат­ру, дия та дяъвилия чивчусса луттирдал выставкагу.
Микку ихтилатру бунни ДР-лул ХIукуматрал председательнал цалчинма хъиривчу Анатолий Карибовлул, ДР-лул ХIукуматрал председательнал хъиривчу Рамазан ЖахIпаровлул, Авгъанисттаннал Ветерантурал союзрал правлениялул председатель МахIаммад Хадулаевлул ва м.ц.

[pullquote]Совет аьралитуран
Авгъаннавусса дяъвилул ишру байбивхьу­ссар 1979 шинал декабрь зурул 25-нний Кабуллай 103-мур гьавалул ва десантрал дивизиялул цалчинмур эшелон щядиркIсса чIумал. [/pullquote]

АхIмад-хан Султаннул цIаний­сса медаль дуллунни СаллатIнал ниттихъал комитетрал председатель, Авгъаннаву жан дуллусса Виричунал нину Зульфия МахIаммадован. Ванин мукунни бахшиш дунни Дагъусттаннал Хъаннил союзрал чулухагу, Гумбетуллал райондалул администрациялул чулухагу.
Бахшишру дуллалиссаксса хIаллай сахIналул чIирая кка­ккан буллай бия та дяъвилул лахI­зарду. Бусравсса хъамаллуран ккаккан дунни ххаллилсса концертгу.
Концерт къуртал хьуну махъ цинявппа бувкIуна шагьрулул администрациялул къатраву тIивтIусса авадансса ссупралухун. Шиккугу хьунни аьчухсса ихтилатру, бахшишру дулаву, балайрду ва къавтIавуртту.