Вай гьантрай хьунни ларгсса шинал хIасиллу дуллалисса Ухссавнил Ккавкказуллал федерал округрайсса Аьрасатнал МВД-лул Агьаммур управлениялул коллегиялул батIаву.
А. Аьбдуллаева
Мунил бакI дургьуману ия управлениялул хъунама, полициялул генерал-лейтенант Сергей Бачурин. Шикку гьуртту хьунни СКФО-лийсса Аьрасатнал Президентнал вакил, Аьрасатнал Виричу Александр Матовников, Национал гвардиялул аьралуннал Ухссавнил Ккавкказуллал округрайсса хъунаманал хъиривчу, генерал-майор АьвдулхIаким ХIажиев, округрал ихтиярду дуруччай органнал хъуними, Управлениялул Жяматийсса советрал председатель Сослан Сикоев ва округрал полициялул подразделениярттал каялувчитал. БатIаврий ихтилат бунни АьвдулхIаким ХIажиевлул.
— Ихтиярду дуруччай органнал системалий СКФО-лийсса Аьрасатнал МВД-лул Агьаммур управление хъанахъиссар оьхIалсса тахсиркаршивурттал хъиривлаявуртту дуллалисса, терроризмалущал ва экстремизмалущал талатисса ца яла агьаммур идарану.
Кувннащал кув хIала-гьурттуну зий, ларгсса шинал жущава бугьан бювхъунни азарунния ливчусса тахсиркартал. Мукунма, цачIу зий, бат дан бювхъунни 40-нния лирчусса пIякь учайсса затру. Ларгсса шинал циняр агьамсса, чIявусса халкь бавтIсса мероприятиярттугу паракьатну гьансса чаран лявкъунни, — увкунни Аь. ХIажиевлул.
Ихтилатру къуртал хьуну махъ шама зузалан «За отличие в службе II степени» лишанну дуллунни.
