Каспийскалий Аслийсса культуралул центрданий чIяруну шай культуралул аслийсса хазнардал гьану ябаву мурадрайсса батIавуртту.
Ва ххуллух «Оьрмулул бугьараминнахасса хIурмат» тIисса ихтилат-лекциялийн оьвкуну бия филологиялул элмурдал кандидат, Хьхьирил кадетуллал школа-интернатрал директорнал хъиривчу Светлана Корниенкойн, ДР-лул Муфтиятрал просвещениялул отделданул каялувчи, Каспийскаллал Хъун-Мизитрал имам АхIмад Бабаевлуйн, канил пишардал усттар Зугьра Лукьмановайн, Каспийскаллал шагьрулул дуклаки оьрчIайн ва муаьллимтурайн.
Бадрижамал Аьлиева
Ихтилатру буллалиминнал кIицI лаглай бия Дагъусттаннай мудангу хъуннасса агьамшиву диркIшиву оьрмулул бугьараминнахасса хIурматрал, ми бакъа шяраву царагу шадлугъ, цавагу мажлис къашайсса бивкIшиву.
Хьусса ихтилатирттал жям дуллай, Каспийскаллал Аслийсса культуралул центрданул директор Башикар Вагьабовал увкунни:
— Нитти-буттах, оьрмулул хъуниминнах вичIи дишаву – му зунттал законни. Оьрмулул хъунаманахь дуссар ихтияр чIивиманай бювкьу-аьй дувансса, агарда му аьркин дакъасса ци-дунугу дуллай, къалайкьну къуццу тIий ухьурча, дуссар ихтияр мунай ци-бунугу бигар бишинсса, оьрмулул чIивиманахьрив дакъассар ихтияр цахьва увкумунийн къаччан бикIансса ягу бува увкумур къабувансса.
БатIаврий хьусса ихтилатирттал лях-карах ккаккан дурна тIимуницIун даркьусса видеофильмругу.
