Январьданул 14-нний МахIачкъалалив ДР-лул ХIукуматрал председательнал 1-ма хъиривчу Анатолий Карибовлул каялувшиврий ххал диргьунни республикалийсса санитар-противоэпидемиологиялул тагьар ва мусикъеп (корь) ппив шаврийн къаршисса чаранну.

«ДР-лийсса гигиеналул ва эпидемиологиялул центр» ФБУЗ-рал хъунмур хIакиннал хъиривчу Аьйшат ХIажиевал тIимунийну, мусикъепрал къашавайсса оьрчI-бакI гьарзану бур Къумтуркъалаллал, Лаващиял, Тарумовскаллал, Сергокъалаллал районнай ва Избербашлив. Яла чIявусса оьрчI-бакI къашавай хьуну бур МахIачкъалалив – циняв къашавай хьуминнал 59,3%, ягу 157 оьрчI. Мунил бувсунни мукунма ци бан аьркинссарив, къушлий оьрчI-бакI мусикъепрал къашавай хьурча.

БатIаврий Роспотребнадзорданул вакилтурал бувсунни иммунитетрал профилактикалул давурттавусса ва эпидемиялийн къаршисса профилактикалул давурттавусса диялда­къашивурттая.

ДР-лул цIуллушиву дуру­ччаврил министр Жамалуттин ХIажиибрагьимовлул бусаврийну, жагьилсса ниттихъул махъаллил хъанай бур вакциналул ххалаххив баврия.
Карибовлул тапшур бунни муданна дуллан профилактикалул давуртту, дачин дуван информациялул политика, инсантурахь буслан ми азардах багьайсса къулагъас къадарча, ахир оьнийн дуккан бюхъайшиврия.

ХIадур бувссар
ХI. Аьдиловлул