Дагъусттаннал социал идарарттаву вай гьантрай тамансса ихIсандалул акцияртту хьунни. МахIачкъалаливсса Балугъравун биян буваминнансса социал-реабилитациялул центрданий хьусса шадлугърай «Къиргъу» ттучандалул ххуйсса бахшишру дунни центрданул аякьалийн ларсъсса оьрчIан.
П. Рамазанова
Шадлугъ дунни «Забота» тIисса интернатравугу. Шикку гьуртту хьунни ттуршунниха ливчусса оьрчIру. Аниматортурал оьрчIан, буниялттунгу, ххуйсса байран хIадур дурну дия, магьрал ва мультикирттал персонажирттащал оьрчIру тIуркIутIи бувсса. «Къиргъу» ттучандалул ва центрданунгу спортзалданувун бичинсса кIива хъунмасса бартбису буллунни.
Бугьараминнансса ва мушакъатминнансса «Ветеран» центрданий яхъанахъиминнал миннатрайн бувну, шанма цIусса телевизор буллунни «Къиргъулул». Му бакъассагу, пишкаш дунни ххуйсса пылесосгу.
Укуннасса ка-кумаграл давурттив дунни Дарбантливсса «Къиргъулул» филиалданулгу: социал-реабилитациялул центрданийсса оьрчIан байран дунни. Буйнакскаливсса ЧIивитIултрал къатлунгу вайннал пишкаш бунни янна шюшай машина. Гьаннайсса, цуми учреждениярттан ци аьркинну дуссарив кIул бувну, шайсса кумаг бунни.
