Январь зурул 23-нний «Дагестанская правда» кказитрал редакциялий хьунни Национал библиотекалий хьунтIисса регионнал дянивсса «Транспорт. Логистика. Связь 2019» выставкалун хас дурсса пресс-конференция.

Имара Саидова
«АНЖИЭКСПО» выставкардал компаниялул директор Мукаил Исмяиловлул журналистурахь бувсунни ва журалул выставка даврийну хъунмасса кумаг хъанахъишиву республикалий транспортрал комплекс хьхьичIунмай шаврин. Ванал кIицI лавгунни жула региондалийн хъунисса инвестортал бучIан бавринсса чаран ххишала хъанахъишиву.
— Выставкалул календарь сакин буллалийни, жу хIисавравун ларсъссия Дагъусттаннал халкьуннал тIалавшиннарду. ХIисавравун лавсъссия цIана жула республикалий логистика хъинну ишлану ва хьхьичIуннай хъанай душиву. Чялишну буллай бур ххуллурду, цIу буккан буллай бур МахIачкъалаллал аэропорт ва хьхьирил порт. Вай цимурцаннул буслай бур транспортрал комплексру хьхьичIунмай хъанай най бушиву, — увкунни Исмяиловлул.
Выставкалул давривух гьур­тту хьунтIиссар машгьурсса идарартту ва предприятияртту: МахIачкъалаллал аэропорт, Аьрасатнал Почта, Аьрасатнал муххал ххуллурду, Мега Транс, «Navion», «Hyundai» ва цаймигу.
— Жул мурад республикалий­сса ишбажаранчитурал чIарав бацIавур. Бигьану бакъая Да­гъусттаннайн машгьурсса хъунисса компанияртту дучIан дувансса кьутIирду дуллан. Выставкалул спонсорну хьунни «Navion» компания, мукунма жул партнерталну хьунни респуб­ликалул Машлул ва промышленностьрал палата. Пикрирдай буру цIусса лагрулул выставкалий республикалийсса ишбажаранчитурал бизнесрал презентацияртту дан, — тIий, буслай ия Исмяилов.
Выставкалул даврил лагрулий хьунтIиссар министерстварттал ва ассоциациярдал вакилтуращалсса семинарду, конференцияртту, ккуркки-столлу, бизнес-хьунабакьавуртту, презентацияртту.
Цала ихтилатраву выставкалул даврил агьамшиврия балжину бувсуна Республикалул информатизациялул, связьрал ва коммуникациярттал министрнал цалчинма хъиривчу Бадруттин МахIаммадовлул.
— Гьашинусса шинал министерство пикрилий бур IT форумру буллан. Ва выставкалийгу хъинну ххариссару гьуртту хьун ва даврил опыт кIибачIин, — увкунни ванал.
Республикалул Машлул ва промышленностьрал палаталул выставкарттал ва ярмаркардал презентациялул отделданул хъунмур Гулпари ХIамзатовал кIицI лавгунни «АНЖИЭКСПО» выставкарттал даву лавайсса даражалий дуллай бушиву ва цала чулуха хIадурну бушиву, бюхъайсса кумаг бувну, чIарав бацIан.
Ахирданий «АНЖИЭКСПО» выставкардал комплексрал директор Мукаил Исмяловлул жавабру дуллуна журналистурал суаллахьхьун.