Январьданул 22-нний ДР-лул ХIукуматрал председатель Артем Здунов хьунаавкьунни Щалвагу Аьрасатнал кьатIаллищалсса машлул академиялул элмийсса давурттал проректор Павел Кадочниковлущал.
Хьунабакьаврий ххал бивгьунни 2035 шинайннинсса ДР-лул Социал-экономикалул стретегия хIадур даврил масъалартту.
Артем Здуновлул тIимунийну, цIанасса ппурттуву му даврицIун цIакь бувну бур республикалул экспертътал, миннавух – депутатътал, элмулул ва бизнесрал вакилтал.
«Стратегиялул сессиярттал хIасиллу дурну махъ, жу ратIарду агьамми материаллу, миннуха зуншиврул. Утти аьркинни дуллан балжисса давуртту. ЦIанава чIалан аьркинссар ца 15 шинавату жува цукун ялапар хъанантIиссарив. Жува къуццу тIун аьркинссару цIанасса чIумун лавхьхьуну. Мунияту жу оьвчарду республикалийн лавайсса даражалул пишакартурайн. Ттун ччай бур циняв масъалартту, личIи-личIину дузал къабуллай, цачIу бартбигьлан. КIулли ми гьарзат ца республикалул бюхъулийну дузрайн буккан буван къашайшиву, мунияту жу чул бишлай буру федерал центрданул кумаграйн», — увкунни Артем Здуновлул.
ДР-лул ХIукуматрал председательнал 1-ма хъиривчу ХIажимахIаммад ХIусайновлул бувсунни Стратегия даркьуну душиву Аьрасатнал Президентнал «майрал» хIукмулуцIун.
«Стратегия хIадур даврицIун бавхIусса циняв масъалартту ххал бигьлантIиссар ДР-лул БакIчиначIасса Советрай. ЦIанасса хъунмур масъала хъанахъиссар ДР-лул экономика хьхьичIуннай хъит учин даву. Ми циняв масъалартту жучIава пландалийн лавсун буссар ва даву дачин дуван хIадурссару», — увкунни цалчинма вице-премьернал.
Павел Кадочниковлул республикалул каялувчитурахь барчаллагь увкунни му агьамсса давривух цивппа хIала-гьуртту хьун оьвчаврихлу.
