Январь зурул 21-нний Буйнакск шагьрулий агьали кьамул бунни Аьрасатнал Федерациялул Думалул депутат Аьвдулмажид МахIрамовлул.
Имара Саидова
М. ХIажиевлул цIанийсса 5-мур школалул директор ПатIимат Гъазиханова ва КIулшивуртту дулаврил зузалтрал профсоюзрал комитетрал председатель Асият Аьдилханова бувкIун бия школалий спортзал баврил масъалалул ялув. П. Гъазихановал бувсуна 1912 шинал дурсса школалул къатри гьарта-гьарза дурну, цIу дуккан дурну диркIшиву 1952 шинал. Ва школалий чIярусса шиннардий дарсру дихьлай ивкIун ур халкьуннал учитель Булач ХIажиев ва чIявусса цаймигу хьхьичIунсса вакилтал. Школалул каялувчитурал депутатнахь тавакъю бунни ва масъала дузал баврил чIарав ацIаву.
МахIрамовлул махъ буллунни, КIулшиву дулаврил ва элмулул министерствалул каялувчитурайн увккун, цащава шайсса кумаг бан.
Шагьрулул 6-мур школалул директор ПатIимат Атаева бувкIун бия школалий щин диялну дакъашиврийн бувну, цивпа азурда хъанай бушиву бусан. Ванил бувсунни, шагьрулул зума-къирагърайсса школалул лагма-ялтту чIяру зивурду дусса къатравун насосирттах щин дачин дуллай, школа щин дакъа личIлай бушиву. Депутатнал хIукму бунни школалий щинал насос дишинсса.
Буйнакск шагьрулул ОьрчIал ва жагьилтурал спорт школалул тренер-преподаватель МахIач Аьвдулмуслимов увкIун ия школалун микроавтобус тIалав баву мурадрай. Ванал бувсунни спортсментал, транспорт дакъашиврийн бувну, республикалул ва республикалул кьатIувсса турнирдай гьуртту хьун къахъанай личIлай бушиву. Ва масъалагу депутатнал махъ буллунни, кIулшивуртту дулаврил министерствалийн увккун, дузал бан.
