Ларгсса шинал вацIрал аьрщив ишла даврихлу Дагъусттаннал вацIрал хозяйствалул 42 млн. къурушрал дирчунни республикалул бюджетравун. Налогру дучIан даврил план биттур дурунни 103%. Муния бувсунни му ведомствалул 2018 шинал хIасиллан хас дурсса батIаврий.
ДР-лул ХIукуматрал председательнал хъиривчу Аьвдулмуслим Аьвдулмуслимовлул бувсунни вацIрал хозяйствалул масъаларттая. Мунал тIимунийн бувну, вацIрал фондрал аьрщив хъапа-шапа дурну дур, ми махъуннай зана дуван, ижаралий дуллуну, миннуя бюджетравун доходру дучIан дуллан аьркинни.
ЮФО-лул ВацIрал хозяйствалул департаментрал хъунама Петр Костеничлул бувсунни махъсса шиннардий ВацIрал хозяйствалул комитетрал давриву хьусса хъин чулийсса дахханашивурттая, Каспий хьхьирил чIарахсса вацIлул кIанттурду федерал заллушиврийн зана буван ва ми цила мурадрай ишла буллан аьркиншиву.
ДР-лул ВацIрал хозяйствалул комитетрал Председатель Аьлибаг ХIажиевлул бувсмунийну, ва идаралул агьамми масъаларттавасса ца хъанай бур вацIри буруччаву ва цIу буккан баву. «Ларгсса шинал цIусса мурхьру бувгьуссар 664 гектарданий. 2018 шинал вацIрал аьрщив ишла даврихлу дартIсса арцул план бартдигьуссар щаллуну. Республикалул бюджетравун дучIан дурссар 42 млн. къурушрал», — увкунни ХIажиевлул.
Мунал тIимунийну вацIлул хозяйствалул зузалтрал хьхьичIсса ялагу ца агьамсса масъалану хъанахъиссар вацIлуцIун цIу дагьан къадитаву. Мунал бувсунни му ххуллий цалва идаралул зузалтрал дурсса ва дуллалисса давурттаяту.
ХIадур бувссар
ХI. Аьдиловлул
