Январьданул 19-нний Дагъусттаннал БакIчи Владимир Васильев гьуртту хьунни «Единая Россия» партиялул региондалийсса отделениялул ХХХI конференциялий. Мунал барча дунни Хизри Шихсаидов партиялул Дагъусттаннал региондалийсса отделениялул секретарьну увчIаву.
Дагъусттаннал БакIчинал тIимунийну, «Единая Россиялул» проектирдал чIалачIи бунни цалла мюнпатшиву. «Жу цумур дунугу царай къатрал хIаятравун бувкIун, чув, ци даххана дуван дурив гикку ялапар хъанахъиминнахь цIувххукун, муния мюнпат шай. Мунийн бувну проектру системалийн дуркIунни», — увкунни региондалул каялувчинал. Мунал бусаврийну, гьашину республикалий дузалшиндарал давуртту дуллай бур 81 хIаятраву, 55 жямат салкьи шайсса кIанттурдай ва 1 паркраву.
Владимир Васильевлул бувсунни ххуллурдай апатIсса ишру чан хьун баврил ва инсантал литIлатIисса иширттал хIакъиравусса проектирдаятугу.
Партиялул члентурахь мунал барчаллагь увкунни бувчIавурттал компаниялухлу.
МуницIунма мунал дакIнийн бувтунни Избербашлив захIматшивуртту диркIшиву, тикку «Единая Россия» партиялул лавсун бивкIссар бувагу 37% чIурдал. ЦIанасса ппурттуву тикку тагьар хъин чулиннай даххана хъанай дур.
Дагъусттаннал БакIчинал ихтилат бунни мукунма духIи-дуциндарал хIакъиравугу: «Цалла давурттая лавгунни 22 партиялул член, ми уголов танмихIрайн кIункIу бувну тIий. Мунилгу пикри буван аьркинссар», — увкунни мунал.
Конференциялий ихтилатру хьунни партиялул цаймигу масъаларттал хIакъираву.
ХIадур бувссар
ХI. Аьдиловлул
