ЦIанихсса буттал лайкьсса душ

ЦIанихсса буттал лайкьсса душ

Фарида Феодаева

Ларгсса нюжмардий ДГУ-лул тарихрал факультетрай хьунни тарихрал элмурдал кандидат, ДГУ-лул билаятрал тарихрал кафедралул доцент Фарида Феодаевал аьпалул мажлис. Гьашину мунин там хьунтIиссия 90 шин.

Бадрижамал Аьлиева
Фарида Загидовна хъин­сса мукъуйну дакIнийн бутан бувкIун бия ванил дарс дирхьусса студентътал, муаьллимтал, профессортал, архIал зий бивкIми, гъан-маччами. Вания бусанмургу, ванил цIаницIун дархIусса дакIнийнбичавурттугу гьарцаннал дакIниву чIяруя.
Аьпалул вечерданул дайдихьу дуруна тарихрал факультет­рал декан Башир Булатовлул. Мунал кIицI лавгуна билаятрал тарихрал элмулуву Фарида Загидовнал кьабивтшиву хъунма­сса бутIа, тарихрал факультетрал ххуллий ванил дуршиву хъуни-хъунисса давуртту.

Фарида Феодаевал гъанмаччами

Гихунмай махъру лавхъуна ДГУ-лул проректор МахIаммад ХIасановлул, Аьрасатнал кафед­ралул доцент Валентина Егоровал, доцент Жамиля Апанниевал, профессор, философиялул элмурдал доктор ХIурия Юсуповал, ДГУ-лул муаьллим Калимат Баратовал, ДР-лул Халкьуннал Мажлисрал Аппаратрал зузала Асият Пирбудагъовал ва цайминнал.
Гьарцагу ихтилатчи чIурчIав дуллай ия Фарида Феодаевал, анжагъ кIулшивуртту дулаву дакъассагу, оьрмулул дарсругу дирхьушиву, гьарцагу студентнаха ниттил куннасса аякьа диркIшиву.

Ласайсса гьарцагу шаттираву аристократшиву щуркIал хъанахъисса, циятурасса, анжагъ муаьллимная дакъа, инсанная кунна, хъуннасса жаваблувшинна дусса Фарида Загидовнал лекцияртту бивкIун бур студентътуран ца яла ххирами ва оьрмулухун дакIний ливчIми, мунил дирхьусса дарсирдал щала оьрмулийн, захIматрал ххуллийн асар биян къабувну къаличIайсса бивкIун бур.
Щала Дагъусттаннайх ва мунил кьатIух цIа дурксса, Гьун­чIукьатIрал шяравасса Загьиди Феодаевлуя цамур ку­ццуйсса душгу къабизанссия.

Аьпалул вечерданий хьунни Фарида Феодаевал «Русско-дагестанские отношения во второй половине ХVIII – начале ХIХ вв.» цIанилусса луттирал презентациягу. Му луттираясса ихтилат бунни ДГУ-лул Аьрасатнал тарихрал кафедралул профессор Нина Гьаруновал.
Фаридал ссу кунмасса ссурахъу Сабират ТIагьировал мажлисрал ахирданий барчаллагь увкунни Фаридаясса аьпа ябуллалиминнахь.

Читайте также: