[dropcap]М[/dropcap]ахъ-зуманив прессалий ппив хьусса ниттил мазру яла бугьаврил ва лахьхьаврил тагьар хушрайсса дикIантIиссар тIисса закон кьамул даврил ялувсса аьлагъужа сукку хьунни регионнай.
ПаччахIлугърал Думалул ххал диргьусса законопроект миннал ккалли дуллай бур мазрал политика лиян даврин. МуницIунгу, мунил лагма-ялттусса пикрирдацIунгу бавхIусса гьарза-гьартасса ихтилат буллай буру Дагъусттаннал Журналистурал союзрал хъунама, яруссаннал «ХIакъикьат» кказитрал хъунама редактор Аьли Камаловлущал.
— Аьли АхIмадович, цукунсса тагьар дур хIакьину Дагъусттаннал ва Ухссавнил Ккавкказнал СМИ-лул?
— Ниттил мазурдил тагьар ххуйну дур чаву щялмахъ хьунссар. Тагьар ххуйсса дакъар, Дагъусттаннал вивгума леххаву рутлатисса дур. Жула ва ца миллат ялапар хъанахъисса регион дакъархха. ХIатта му чIумалгума маз мискин хъанай бур, сипат дакъа хъанай дур, мазрал рангру дакъа хъанай дур. Му бакъасса, хIисав бара, агьали буттахъал минардая бивзун нанаврил, мазру бюкьлакьисса миграциялул иширтталгу инсантал кIура баян буллай бур мархха-ххун дакъасса «дунияллул халкьуннайн». КъакIулли му тIабиаьтралва иш буссарив. Амма жула буржри жуйнма ппухълуннал аманат бувсса мазру буруччин. ЧIявусса гъалгъа тIий буру глобализациялия – ттунгу ххуйну бувчIлай бур тIабиаьтрал иширттащал талан къабюхъантIишиву, так къарши бацIарча бакъасса.
[pullquote]Мюрщи миллатирттал магьирлугъ хъуни миллатиртталмурнияр ссалчIав мискинсса ягу яларайсса дакъассар. ЧIярусса ттуршукурдал хьхьичIра чирчусса литературалул канихчичрурду ккалаккисса чIумал, на махIаттал ара пикрирдал куртIшиврул, авторнал хатIлил пасихIшиврул ва аваданшиврул.[/pullquote]
Мюрщи миллатирттал магьирлугъ хъуни миллатиртталмурнияр ссалчIав мискинсса ягу яларайсса дакъассар. ЧIярусса ттуршукурдал хьхьичIра чирчусса литературалул канихчичрурду ккалаккисса чIумал, на махIаттал ара пикрирдал куртIшиврул, авторнал хатIлил пасихIшиврул ва аваданшиврул. Цумур произведение ласурчагу, му анжагъ, шеърилул ва прозалул произведение бакъарча, му бур заманалул макьу, халкьуннал психология, дуниял сакин шаврил ттуршукурдал сипат ккаккан дуллалисса документ.
ДакIний бурив, Р. ХIамзатовлул махъру «Агарда, гьунттий ттул маз бухлагарча…» тIисса. Му дучIантIисса ттуршукулийнсса, жула наслулийнсса рисалар, тIабиаьтрал катаклизмардал ва миграциялул щатIул миллатрал аслишиву ласун къаритан оьвтIутIисса. Бюхъайссарив бацIан бан му процесс? На хъинмунийн умуд бишин хIарачат буллай ура. Амма ниттил мазру бикIан аьркинссар тIий ура паччахIлугърал муданнасса аякьалулу, ми аьркинссар машгьур буллан, кумаг буллан аьркинссар гьунар бусса шаэртурал, чичултрал произведенияртту дунияллийн буккан буллан. ЧIярусса захIматшивуртту хьунадакьлай дур миллатрал прессалул дунияллий. Цукун бакI буклай бур миллатрал кказит-журналлу? КьюлтI къабулланна, шярайх буккул даражалийн багьну бур. Ккашил къабивчIансса ччатI буллай бур, дахьва рухI дуну личIаншиврул. Му тасттикь хьунтIиссар, дахьа редакциярттал кабинетирттавух уккарчагума. Ихтилат журналистурал хъинну чIивисса харжираягума бакъар, хъинну лащинсса тагьарданий бур материал-техникалул база.
[pullquote]Миллатрал прессалул, дагъусттаннал журналистикалул чIявуми суаллу бавхIуну бур подпискалул багьлуцIун. Му дянивну ялапар хъанахъисса буккул кашилун лавхьхьусса бакъар. Цимурца монополистурал кIунттилу дур. Подпискалухсса багьлул хъунмур бутIа ласлай бур почталул. [/pullquote]
Амма жува мудан тикрал буллайнма буру миллатирттал мазру ябан аьркиншиву. Мазру бухкъалаганшиврул гай аьркинссар ишлану бикIан. Ниттил маз чIиви оьрчIал мазраву бикIаншиврул аьркинссар ганахь мудан ниттил мазрайсса гъалгъа буллан: миллатрал кказит-журналлу ккалан, школалий мазру лахьлан. Ниттил мазру машгьур баву бакIрал чагъарну хьун аьркинссар школалун, вузран, миллатирттал СМИ-лун, телевидениялун. На укун тIутIисса миллатрал кказитрал редакторшиврий акъарача, ниттил мазурдил буруккинттарайсса, жагьилсса никирал буруккинттарайсса инсан хIисаврайра.
— Мяълум бан ччива, ци кIану бугьлагьиссар миллатрал прессалул мазру хьхьичIунмай бавриву, ппухълуннал ва наслулул дянивсса гъалгъалуву?
— НукIува увкусса куццуй, хIакьину миллатрал пресса лащинну бур. Жуяту цалсса ми чIун ляхну итабакьлан, зузалт чан буллан тIалав буллай бакъахьурчагу, къума буллай буру. Цукунни творчествалуха зунтIисса, властьрал чулуха республикалул буруккинттах къулагъас къачIалачIийни?!
Щалагу Ухссавнил Ккавкказнал республикарттал пресса цачIун буллалисса инсан хIисаврай, ттун хIакьсса сурат чIалай дур, цинярда республикарттал буруккинтту лавхьхьусса бур. Цумацагу ттул коллега леххаву тIий ур, ниттил мазрал дарсирал кьимат школа къуртал буллалисса аттестатрай чара бакъа бикIан аьркинссар, школалул программалувун миллатрал вирттавраясса, хьхьичIавасса эпосраясса ва хIакьинусса кьинилиясса кинофильмру дичин аьркинссар тIий.
Жула республикалий миллатирттал мазурдийн дагьайсса закондалуха зий байбивхьусса чIумал, ПаччахIлугърал Думалул кьамул дунни закон, ниттил мазрал дарсру ссуссукьу дансса, ми дарсирдал кIану факультативрдахьхьун булунсса. Мунил ялув къалмакъаллу сукку шайхту, депутатътурал закондалул цIа даххана дунни, амма мунийну цичIав даххана къархьунни. Умуд бур ва суалданул хIакъираву регионнал кьянкьасса хIучча бугьанссар тIисса.
[dropcap]М[/dropcap]иллатрал прессалул, дагъусттаннал журналистикалул чIявуми суаллу бавхIуну бур подпискалул багьлуцIун. Му дянивну ялапар хъанахъисса буккул кашилун лавхьхьусса бакъар. Цимурца монополистурал кIунттилу дур. Подпискалухсса багьлул хъунмур бутIа ласлай бур почталул. ХьхьичIра-хьхьичI микку багьлай бунува низам дишин, жучIа бур оптимизация дуллайнма. Жул буруккин жулашиврийсса бакъарча, миллатирттал мазурдил бакIрачIан бучIантIимунил ялувссар, ттуршукурдай буттахъал ядурмур жуятурагу ирсирай тапшур дан бюхъаншиврулссар.
Ниттил мазурдиву дуссар жура ттигу хъирив къалавсса, жунна ттигу къалархьхьусса чичрурду, ми лахьхьин ттуршукурдугума диял къахьунтIиссар.
Ларгсса ттуршукулул 90-ку шиннардий байбивхьуссар лапва мюрщисса миллатирттал – табасараннал, цIахъюрдал, рутуллал, агъуллал, нугъайнал, татнал, чачаннал мазурдийсса кказитру итабакьлай. Ми бувар хIакьинусса кьининийнгу ччаннай бацIан. Амма ялун най дур нигьачIаву, гьунттий миннул бакIрачIан ци бучIавивав, ми яхьувивав, къахьувивав тIисса. Му нигьачIаву ялун най дур цIакьну ччаннай бавцIусса, цала муданмасса буккулт бусса кказитиртталгума.
МуницIун бавхIуну ччива цаппарасса къуллугъчитуран дакIнийн бутан, щалла дунияллий душиву закон, миллатирттал кказит-журналлан паччахIлугърал кабакьу буллан аьркинссар тIисса. Миллатрал мазрайсса литературагу, театргу, СМИ-гу къабуруччирча, миллат рухIирацIа шайссар.
— Ссаха зий буссар миллатирттал прессалул академия? Мунин ци кумаг аьркинссар?
— Миллатирттал прессалул академиялул мурадну хьун аьркинссар регионнал миллатирттал рувхIанийшиву ва мяърипат цалий дацIан даву, ми хьхьичIуннай даву, машгьур даву. Аьрасатнал миллатирттал прессалул академия сакин бувссар 2003 шинал нава Аьрасатнал Журналистурал союзрал секретарьну увчIусса чIумал. Мунил учредительтал хьуссар Аьрасатнал миллатирттал ассамблея ва Аьрасатнал Журналистурал союз. Мивунна дурхссар цинярдагу
миллатирттал республикарттал журналистурал союзругу.
Мура шинал сакин бувссар «Ккавкказуллал къатта». Миллатирттал прессалул академиялул Президентну увчIуну уссия та чIумал Аьрасатнал Совет федерациялул хъунаманал хъиривчуну зий ивкIсса В. П Торшин. Жул умуд бия паччахIлугърая арцуйнусса ка-кумаг хьунссар тIисса. Амма, микку жула умудру чулийн къабувккун ливчIукун, сукку дарду документал суратирттал проект «Кунаки» тIисса. Байбивхьуссия му «Дагомысрай» прессалул фестивальданий.
«Журналист» журналдания.
ХIадур бувссар
Зулайхат Тахакьаевал
P.S. Республикалул БакIчинал ва ХIукуматрал кабакьаврийну вай гьантрай МахIачкъалалив «Пирамида» кинотеатрдануву най дур ХII кинофестиваль «Кунаки». Фестивальданул президент бур машгьурсса журналист, Аьрасатнал Журналистурал союзрачIасса миллатирттал СМИ-лул масъалартталсса буллалисса центрданул хъунмур Сулиета Кусова, директор – «ТЭФИ» тIисса миллатирттал телевидениялул премиялул лауреат Илияс Богатырев.
