Агьалинал, идарарттал къатрайн ягу цайми кIанттурдайн цIу дагьарча, цуксса зарал биллалиссарив жу мудан буслай буру. Яла-яла ва балаллуву оьрмулуцIа хъанай бур инсантал.

ЦIу ларчIсса гьарица ацIул­­чинмур иш мюрщи­сса оьрчIру савав хьусса бур. ЧIя­вуми оьрчIан кIулну бакъар цIу ларчIсса кIанттурдая цукун ххассал хьунссарив. Мукунсса чIумал оьрчIру нигьабувсун лабикIлай бур шкапир­ттаву, кроватирттал лув. Нузру тIиртIуну духьурчагума, оьрчIру кьатIув лихъан мурчIи бацIлай бакъар. ПуркIурал бувцIусса къатлуву ми лякъин захIмат хъанай бур.

[dropcap]Ш[/dropcap]колалийн гьаннинсса чIумалгу, мюрщими классирттаву дуклакисса чIумалгу оьрчIан лахьхьин буллан аьркинссар цIарая мюхчан хьунсса куц. Му даву оьрчIащал дуллан аьркинссар хъуниминнал. ОьрчIру цIу къадагьансса куццуй су­кку тIун аьркинссар садикир­ттавугу, ичIувагу, кIичIираву ва вацIлувугу. Мюрщисса оьрчIан цIарая мюхчан хьунсса куц бигьану лахьхьин бан хьунтIиссар муницIун бавхIусса шеърирду, магьри ккалай, суратру, плакат­ру ккаккан дуллай.
Шаппа цивппалу ливчIсса оьрчIру спичкардащал тIуркIу къатIуншиврий, миннал электросетьравун пач, чайник ягу цамур цикIуй къадучIаншиврий, тIуркIу буллай къавтIи къабичиншиврий вихшала дакъар.

[dropcap]Ч[/dropcap]Iявуну нину-ппу бикIай оьрчIру бялахъан бан миннахьхьун спичкарду дуллай, килпитIирттая къалипру буллай, хIисав дан лахьхьин буллай, ми лавхъсса майлул чирахърайн гьуп учин буллай хIаз ласлай. Вай хъуниминнал оьрчIащал буллалисса тIуркIурдая хъунна­сса нигьачIаву дуссар. ОьрчIру аьдат хьуну, хъуними бакъасса чIумалгу спичкардащал тIуркIу тIунтIиссар. ОьрчIру хъуни хьун­нин спичкарду, майлул чирахъру, зажигалкарду, электрочяйникру, мангъаллу миннал ка къадияйсса кIанттурдай дирхьуну дикIан аьркинссар.

[dropcap]М[/dropcap]и дихьлахьисса чIумалгу оьрчIан щак багьан къабучIиссар цаятура дукьлай бушиву. Му кIулхьурча оьрчIан хъиннува гъира багьай­ссар миннуха зун. Хъуннасса нигьачIаву дуссар оьрчIру цив­ппалу лавкьусса къатраву, квартирардаву кьабитаврия. Балики цIу дагьарча, миннаща кьатIув буккан къахьунтIиссар, ми хха­ссал бан бувкIминнангу захIмат хьунтIиссар.
Ца-ца чIумал цIу лачIавриясса леххаву чIалну дуркIун, му лещан дансса чаран чIумуй къалявкъуну, кумаг бан чIал хьусса ишругу шай. Дуруччияра цIарая мюхчан шаврил низам.

Э.Ф. Кьурбанова, виваллил службалул лейтенант
ХIадур бувссар А. Аьбдуллаевал