[dropcap]Р[/dropcap]еспубликалул муниципалитетирттай унгу-унгуну щуруй дур «100 школа» тIисса проект. Вай гьантрай ва проектрал лагрулий

МахIачкъалалив ва Каспийскалий бакьин буллалисса школартту ххал бувунни ДР-лул Минэкономрал каялувчи ХIусман ХIасбулатовгу гьурттусса комиссиялул.

---

З. АьбдурахIманова
Цалчин вайннал ххал бувунни МахIачкъалаллал 51-мур школа. Шикку уттинин, щала магъигу даххана дурну, цIусса котельня буллансса давурттал хIадуршинна дуллай бур. Комиссиялул зузалтрахь тавакъю бувунни дяркъу хьуннин анавар буккан.
Хъирив вайннал ххал бувунни шагьрулул 34-мур школа. Шиккугу най дур хъинну агьам­сса капитал ремонт. Проектрал лагрулий ва школалий бакьин буллай бур спортзалгу.
Бивунни вай мукунма чIа­вахьултту ва магъи даххана дуллалисса шагьрулул 8-мур школалийнгу.

МахIачкъалаллал 4-мур школалий меценатътурал арцух тIурча, цIу дурну дур гъилишиву дулайсса щала система ва лирчIун дур цIу къалачIун дувайсса мюхчаншиврул давур­ттал лагру.
Каспийскаллал школар­тту ХIасбулатовлул ххал бувунни ДР-лул кIулшивуртту дулаврил ва элмулул министр Уммупазил Оьмароващал. Комиссиялул ххал бувсса 3-мур школалий, кIантту-кIанттурдай чIавахьулттугу баххана бувну, 5 санузел цIу дурну дур. ЦIана хIадур хъанай бур канализациялул ва гъилишиву нанисса системартту цIу дуллансса давуртту дайдишин. Каспийскаллал 4-мур школалийгу ца­ппара чIавахьултту баххана бувну, санузеллугу, кабинетирттал нузкьунттугу даххана дан хIадур хъанай бур.

Шиккува дакIнийн бутан, рес­публикалий «100 школа» тIисса ва проект щурун диркIссар жула бакIчи Владимир Васильевлул сипталий. Ванил мурадгу хъанахъиссар, школартту бакьингу бувну, дуклаки оьрчIансса шартIру къулай даву. Проектрал лагрулий бакьин буллали­сса школарттан республикалул бюджетрава субсидиялун итадаркьуссар 2 миллион арцул ва лирчIмигу – муниципалитетир­ттал бюджетирттава ва кумаг бан каши дусса меценатътурал.
ХIакьинусса кьини ва проект­рал кашилийхчин бакьин буллай буссар республикалул 117 школа, миннувух – зунттал щархъавуссагу.